PCMC Job Scam – पिंपरी-चिंचवड महापालिकेत नोकरी लागल्याचे बोगस नियुक्तीपत्रे समाजमाध्यमांवर व्हायरल झाली आहेत. या प्रकरणाची पालिकेने गंभीर दखल घेतली असून आयुक्त श्रावण हर्डीकर यांच्या आदेशानुसार महापालिका प्रशासनाने पोलिसांत तक्रार दिली आहे. पोलिसांकडून प्राथमिक तपासानंतर पुढील कार्यवाही केली जाणार आहे. महापालिकेत सद्यस्थितीत कोणतीही भरतीप्रक्रिया सुरू नाही. तरीही काही व्यक्तींनी महापालिकेच्या नावाने बनावट लेटरहेड, शिक्के आणि स्वाक्षऱ्यांचा वापर करून नियुक्तीपत्रे तयार केली आहेत. नियुक्तीची तारीख, पगार, महागाई भत्ता, चाचणी कालावधी, कागदपत्रे सादर करणे आदी उल्लेख केलेले आहेत. तसेच, नियुक्तीपत्रासोबत रुजू होण्याची तारीख व विभागाचे नावही देण्यात आले आहे. हा प्रकार पुढे आल्यानंतर यात रॅकेट कार्यरत असण्याची शक्यता नाकारता येत नाही. त्यामुळे पालिका प्रशासनाने तरुणांनी याला बळी पडू नये, असे आवाहन केले. त्याचबरोबर आता फौजदारी कारवाई सुरू केली आहे. पालिकेचे सहआयुक्त मनोज लोणकर यांनी बुधवारी (दि. २५) संत तुकारानगर पोलिस ठाण्यात तक्रार केली आहे. जनमानसात पालिकेची प्रतिमा मलिन होऊ नये. यासाठी संबधित बनावट नियुक्तीपत्राची पडताळणी पोलिस यंत्रणेमार्फत होणे आवश्यक आहे. त्यामुळे अज्ञात व्यक्ती विरुद्ध गुन्हा दाखल करावा आणि त्यासाठी प्रशासन अधिकारी गोरखनाथ लिमण यांना प्राधिकृत केल्याचे पत्रात नमूद केले आहे. “बनावट नियुक्तीपत्राचा हा गंभीर प्रकार निदर्शनास आल्यानंतर आयुक्तांनी दिलेल्या निर्देशानुसार पोलिस प्रशासनाकडे तक्रार दाखल करण्यात आली आहे. प्राथमिक तपासानंतर त्यांच्याकडून पुढील कार्यवाही करण्यात येईल.” – मनोज लोणकर, सहआयुक्त, पिंपरी-चिंचवड महापालिका
