बारणे, काटे, जगताप आणि लांडगे कुटुंबांचे महापालिकेत वर्चस्व; एकाच प्रभागात भावकीच्या लढतीत प्रस्थापितांना मोठा फटका.
PCMC Election 2026 – पिंपरी-चिंचवड शहर अनेक लहान-लहान गावांना समाविष्ट करुन वसविण्यात आले आहे. या लहान गावांचा कारभार पूर्वीपासून येथील स्‍थानिक काही कुटुंबे चालवित होती. तेव्‍हापासून सुरू असलेले गावकी-भावकीचे अधिपत्‍य २०२६ मध्ये देखील कायम असल्‍याचे दिसून आले आहे. महापालिकेचा प्रत्‍येक प्रभाग हा एखाद्या मोठ्या गावासारखा आहे. या गावांमध्ये पूर्वीपासून येथील स्‍थानिक कुटुंबांचे वर्चस्‍व आहे.

शहराची लोकसंख्या तीस लाखांच्‍या पुढे गेली आहे. स्‍थानिक रहिवाशांची संख्या जेमतेम लाखभर आहे परंतु स्‍थानिक कुटुंबांनी राज्‍याच्‍या आणि देशाच्‍या काना-कोपऱ्यातून उदरनिर्वाहासाठी आलेल्‍या कुटुंबांना आपल्‍या परिसरात सामावून घेतले आहे. स्‍थानिक कुटुंबांशी बाहेरुन आलेल्‍या नागरिकांचे असलेले आपुलकीचे नातेच स्‍थानिक रहिवाशांना वारंवार नेतृत्‍वाची संधी देते.

पिंपरी-चिंचवड औद्योगिक विकास सुरू होताच मोठ्या संख्येने देशाच्‍या काना-कोपऱ्यातून नागरिक येथे येऊन राहू लागले. बाहेरुन येणारा प्रत्‍येक नागरिक थोडे दिवस का होईना गाववाले म्‍हणून ओळखल्‍या जाणाऱ्या स्‍थानिक कुटुंबीयांकडे भाडेकरु म्‍हणून राहिला आहे. बाहेरुन येणाऱ्या कुटुंबांना स्‍थानिकांनी प्रदान केलेली सामाजिक सुरक्षितता, आदर आणि अडी-अडचणीच्‍या काळात केलेल्‍या मदतीमुळे स्‍थानिकांना आजही तो मान-सन्‍मान दिला जातो.

पूर्वी गावचे पाटील म्‍हणून ओळखल्‍या जाणाऱ्या या कुटुंबांकडे अजूनही शहरातील मोठ्या भूभागाची मालकी आहे. आर्थिक आणि सामाजिक दृष्ट्या सशक्‍त असलेल्‍या गाववाल्‍यांनी शहरात वास्‍तव्‍यास आलेल्‍या नागरिकांना आपल्‍या सक्षमतेचा आणि सशक्‍ततेचा त्रास होऊ दिला नाही, उलटपक्षी मदतच करत राहिल्‍याने राजकारणात या कुटुंबांचे स्‍थान अबाधित असल्‍याने २०२६च्‍या निवडणुकीच्‍या निकालातही सिद्ध झाले.

पक्षापेक्षा विशिष्ट कुटुंबांना प्राधान्‍य
सर्वांत महत्त्वाची बाब म्‍हणजे एकाच आडनावांचे परंतु वेगवेगळ्या पक्षातून निवडणुकीच्‍या रिंगणात उतरलेले उमदेवार निवडून येत असल्‍याने गावकी-भावकीची पकड लक्षात येते. यंदाच्‍या निवडणुकीत थेरगाव परिसरातील बारणे कुटुंबातील तब्‍बल सहा सदस्य नगरसेवक म्हणून निवडून आले आहेत. दापोडी आणि पिंपळे सौदागरमधून देखील काटे आडनावाचे पाच नगरसेवक निवडून आले आहेत.

तर नवी सांगवी पिंपळे गुरवमधून जगताप कुटुंबाचेही पाच नगरसेवक महापालिकेत पोहोचले आहेत. भोसरी व कासारवाडी परिसरातील लांडगे आडनावाचे चार नगरसेवक निवडून आले. वाकड परिसरातून दोन कलाटे, सांगवीतून दोन ढोरे, चिंचवडमधून दोन भोईर निवडून आले. याव्‍यतिरिक्‍त चिंचवडे, तापकीर, साने, कुटे, तरस अशी परिचित स्‍थानिक नावे महापालिकेत पोहचली आहेत.

काही कुटुंबांचे वर्चस्‍व घटले
एकमेकांच्‍या विरोधात अटीतटीच्‍या लढतीत काही कुटुंबाचे वर्चस्‍व घटल्‍याचेही दिसून आले आहे. पूर्वी मोठी पदे गाजविणाऱ्या या कुटुंबांना गावकी-भावकीतच पराभव स्‍वीकारवा लागला आहे.