PCMC Crime – पिंपरी-चिंचवड शहरात अल्पवयीन मुलांमधील वाढती गुन्हेगारी प्रवृत्ती आता केवळ भांडणांपुरती मर्यादित न राहता, अश्लील भाषा, शिवीगाळ आणि अश्लील हावभावांपर्यंत पोहोचल्याचे धक्कादायक वास्तव समोर येत आहे. ओटा स्कीम निगडी, मोरे वस्ती (चिखली), खराबवाडी (चाकण), भोसरी, पिंपळे गुरव, काळेवाडी आदी भागांमध्ये शाळकरी वयातील मुले टोळक्यांमध्ये फिरत एकमेकांना आव्हान देताना दिसत आहेत. विशेष म्हणजे या मुलांकडून सार्वजनिक ठिकाणी निर्लज्ज शिवीगाळ, हातवारे, अश्लील इशारे आणि दहशत निर्माण करणारी भाषा सर्रास वापरली जात असल्याचे नागरिक सांगत आहेत. अशा अनेक रील्स देखील सोशल मीडियावर मोठ्या प्रमाणावर व्हायरल होत आहेत. दहा ते पंधरा वयोगटातील मुले सर्व पातळ्या ओलांडत असताना यांचे पालक नेमके काय करत आहेत ? असाही प्रश्न उपस्िथत होत आहे. स्थानिक रहिवाशांच्या मते, काही वर्षांपूर्वी मोठ्या गुन्हेगारांकडून ऐकू येणारी भाषा आता १० ते १६ वयोगटातील मुलांच्या तोंडात सहजपणे ऐकायला मिळत आहे. रस्त्यावरून जाणाऱ्या नागरिकांवर, महिलांवर, वयोवृद्धांवरही ही मुले अश्लील शब्दांत शिवीगाळ करतात, अंगविक्षेप करतात, उद्दाम हावभाव करून दहशत निर्माण करण्याचा प्रयत्न करतात. ही केवळ उद्धटपणा नसून, गुन्हेगारी मानसिकतेची सुरुवात असल्याचे संकेत असल्याचे सामाजिक कार्यकर्ते सांगतात. विशेषत: मुली आणि महिला असल्यास ही मुले आपसात एकमेकांना घाणरेड्या शिव्या देऊनच संबोधतात. आपण आपल्या मित्राला दिलेल्या शिवीचा इतर एकणाऱ्यांवर काय परिणाम झाला हे ही आर्वजून पाहतात आणि नंतर दात काढून हसतात देखील. गुन्हेगारी सोशल मीडियाचा घातक प्रभाव मोबाइल फोन, सोशल मीडिया रील्स, गुन्हेगारी व्हिडिओ आणि तथाकथित ‘डॉन’ संस्कृतीचा या मुलांवर मोठा परिणाम होत आहे. चित्रपटांतील आणि इंटरनेटवरील अश्लील संवाद, शिवराळ भाषा आणि हिंसक हावभाव हेच ‘स्टाइल’ मानून मुले त्याचे अनुकरण करत आहेत. परिणामी, शाळकरी वयातच अश्लील भाषा बोलणे, शिवीगाळ करणे आणि आक्रमक देहबोली दाखवणे हे त्यांना सामान्य वाटू लागले आहे. पालकांचा अतिलाड समाजासाठी घातक या वाढत्या प्रवृत्तींना आळा घालण्यासाठी पोलिसांनी अल्पवयीन मुलांचे पालक बोलावून त्यांना समज देणे, समुपदेशन करणे अत्यंत आवश्यक आहे. मात्र, प्रत्यक्षात अनेक पालकांना आपल्या मुलांच्या वर्तनाची कल्पनाच नसल्याचे दिसून येते. तर बहुतेक मुले ही आपल्या पालकांच्या अतिलाडाने बिघडलेली आहेत. आपल्या मुलांचे अश्लाघ्य वर्तन ते पाठिशी घालतात. शाळेत किंवा बाहेर कुणी त्यांना हटकले तर हे पालक मुलांची बाजू घेऊन भांडायला जातात. अशा पालकांवर देखील कारवाई होणे अपेक्षित आहे. काही ठिकाणी पोलीस यंत्रणाही या बदलत्या वास्तवाबाबत अनभिज्ञ असल्याचे जाणवते. गुन्हा घडल्यानंतर कारवाई करण्यापेक्षा, गुन्ह्याच्या आधीच हस्तक्षेप करणे हीच खरी प्रतिबंधात्मक पोलिसी भूमिका ठरू शकते. आज शिवी, उद्या शस्त्र? आज रस्त्यावर शिवीगाळ, अश्लील हावभाव आणि दहशत दाखवणारी ही मुले उद्या गंभीर गुन्ह्यांकडे वळणार नाहीत, याची खात्री कोण देणार? अल्पवयीन असल्यामुळे कायद्याचा धाक नसल्याची भावना त्यांच्या मनात बळावत आहे. हीच भावना भविष्यात गंभीर गुन्हेगारीसाठी पोषक ठरू शकते, असा इशारा तज्ञ देत आहेत. वेळीच पावले उचलण्याची गरज पिंपरी-चिंचवडसारख्या वेगाने वाढणाऱ्या शहरात शाळा, पालक, समाज आणि पोलीस यांच्यात समन्वय नसेल, तर ही समस्या अधिक गंभीर होण्याची शक्यता आहे. संवेदनशील भागांमध्ये पोलिसांनी गस्त वाढवणे, शाळांशी संपर्क साधणे, संशयित टोळक्यांवर लक्ष ठेवणे आणि पालकांशी थेट संवाद साधणे गरजेचे आहे. आज दुर्लक्ष झाले, तर उद्या हीच मुले शहरासाठी मोठे संकट ठरू शकतात. त्यामुळे भविष्यातील धोके ओळखून, आत्ताच ठोस आणि संवेदनशील कारवाई करण्याची गरज आहे.
