PCMC 60 Crore Scam : पिंपरी-चिंचवड महापालिकेतील गाजलेल्या ६० कोटी रुपयांच्या उपसूचना घोटाळा प्रकरणानंतर वादाच्या भोवऱ्यात सापडलेले मुख्य लेखा व वित्त अधिकारी प्रवीण जैन यांना अखेर पदावरून हटविण्यात आले आहे. महाराष्ट्र शासनाच्या वित्त विभागाने जारी केलेल्या प्रशासकीय बदली आदेशानुसार नवी मुंबई महापालिकेचे मुख्य लेखा अधिकारी सत्यवान किशनराव उबाळे यांची पिंपरी-चिंचवड महापालिकेच्या मुख्य लेखा व वित्त अधिकारीपदी नियुक्ती करण्यात आली आहे.

मात्र, चौकशीचा अहवाल दिल्यानंतर देखील शासनाने फक्त बदली करत कारवाईचा दिखावा केला आहे. त्यामुळे घोटाळ्यातील केंद्रस्थानी असलेल्या जैन यांना वाचविण्यासाठी धडपड सुरू असल्याचा आरोप होत आहे. महापालिकेतील सुमारे ६० कोटी रुपयांच्या उपसूचना घोटाळ्यामुळे प्रवीण जैन यांचे नाव राज्यभर चर्चेत आले होते. या प्रकरणात आर्थिक अनियमितता, नियमबाह्य व्यवहार आणि वित्तीय प्रक्रियेतील गंभीर त्रुटींवर प्रश्नचिन्ह उपस्थित झाले होते.

यानंतर आयुक्त डॉ. विजय सूर्यवंशी यांनी चौकशी समिती नेमली होती. चौकशीदरम्यान महापालिकेच्या ठेवींच्या व्याजातूनही कोट्यवधी रुपयांच्या गैरव्यवहाराचे मुद्दे समोर आल्याने जैन यांच्या अडचणी वाढल्या होत्या. दरम्यान, शासनाने नुकताच राज्यभरातील लेखा व वित्त विभागातील अधिकाऱ्यांच्या बदल्यांचा आदेश काढला असून त्यामध्ये पिंपरी-चिंचवड महापालिकेच्या मुख्य लेखा व वित्त अधिकारीपदी सत्यवान उबाळे यांची नियुक्ती करण्यात आली आहे.

उबाळे हे सध्या नवी मुंबई महापालिकेत मुख्य लेखा अधिकारी म्हणून कार्यरत होते. महापालिकेतील आर्थिक व्यवहारांबाबत निर्माण झालेल्या संशयाच्या पार्श्वभूमीवर ही बदली महत्त्वाची मानली जात असून, नव्या अधिकाऱ्यांसमोर आर्थिक शिस्त प्रस्थापित करणे, प्रलंबित चौकशींचा पाठपुरावा करणे आणि वित्तीय व्यवस्थेवरील विश्वास निर्माण करण्याचे मोठे आव्हान असणार आहे.

चौकशी गुंडाळली जाणार?
प्रवीण जैन यांची बदली झाली असली तरी उपसूचना घोटाळा आणि ठेवींच्या व्याजातील गैरव्यवहाराबाबत चौकशी सुरू आहे. तसेच पालिकेतील सत्ताधाऱ्यांना देखील हे प्रकरण आता नकोसे झाले आहे. त्यामुळे बदली झाल्यानंतर या प्रकरणावर सुरू असलेली चौकशी सुरू राहणार की दबावात गुंडाळली जाणार याकडे लक्ष लागले आहे.