PCMC 52 Crore Scam – पिंपरी-चिंचवड महापालिकेत बोगस उपसूचनांच्या माध्यमातून ५२ कोटींचा बिल घोटाळा झाला. या प्रकरणी लेखा व वित्त अधिकारी प्रवीन जैन यांची चौकशी सुरू आहे. असे असले तरी तब्बल ७० कामांचे बिल ठेकेदारांच्या खात्यात गेले असल्याचा खुलासा स्थायी समिती सभापती अभिषेक बारणे यांनी बुधवारी (दि. १५) पत्रकार परिषदेत केला. त्यामुळे आयुक्त डॉ. विजय सूर्यवंशी यांनी ठेकेदारांना बिल दिले नसल्याचा दावा खोटा असल्याचे समोर आले आहे. स्थायी समिती अध्यक्ष अभिषेक बारणेंनी मुख्य लेखाधिकारी प्रवीण जैन यांच्यावर भ्रष्टाचाराचे आरोप करत या बिल घोटाळ्याचा भांडाफोड केला. या प्रकरणी आयुक्तांनी चौकशी सुरू केली आहे. चौकशी समितीला दिलेल्या मुदतीला दोन दिवस बाकी असताना भाजप पदाधिकाऱ्यांनी पत्रकार परिषद घेत आपली बाजू मांडली. या पत्रकार परिषदेत महापौर रवि लांडगे, उपमहापौर शर्मिला बाबर, स्थायी समिती सभापती अभिषेक बारणे, भाजपचे शहराध्यक्ष शत्रुघ्न काटे, सत्तारुढ पक्षनेते प्रशांत शितोळे आदी उपस्थित होते. यावेळी बारणे म्हणाणे, बोगस उपसूचना घेण्यात आल्या. त्यावर कोणतीही सही व शिक्का नाही. अधिकृत ठराव आहे की नाही हे न पाहता बिले दिली आहेत. त्यामुळे मुख्य लेखा व वित्त अधिकारी यामध्ये दोषी आहेत. त्यांच्यावर कारवाई झालीच पाहिजे. अभिषेक बारणे ठेकेदारांना वाचविण्याचा प्रयत्न दरम्यान, यामध्ये नगरसेवक व दोषींना वाचविण्याचा प्रयत्न पदाधिकारी करत असल्याचे समोर आले आहे. नगरसेवकांची काही चूक नसून प्रभागातील कामे असल्याने त्यांनी सह्या केल्या. तर ठेकेदारांनी कामे केली आहेत, म्हटल्यावर त्यांना बिले दिलीच पाहिजे अशी भूमिका पदाधिकाऱ्यांनी घेतली आहे. त्यामुळे अधिकाऱ्यांना दोषी ठरवून सह्या करणारे नगरसेवक व ठेकेदार सहीसलामत सुटणार असल्याची चर्चा महापलिका वर्तुळात रंगली आहे. आमदारांना पक्षश्रेष्ठींनी झापले, पदाधिकाऱ्यांचा यु-टर्न… भाजपच्या अंतर्गत वर्तुळात शहरातील एका आमदाराला पक्षश्रेष्ठींनी खरमरीत शब्दांत जाब विचारल्यानंतरच सर्व पदाधिकाऱ्यांनी एकत्रित पत्रकार परिषद घेतली असल्याची चर्चा आहे. विशेष म्हणजे सर्व पदाधिकाऱ्यांना एकत्रित येण्यासाठी घोटाळा उघड झाल्यानंतर तब्बल एक आठवडा लागला. तर यावेळी नगरसेवकांसह ठेकेदारांना वाचविण्याची देखील भूमिक पदाधिकाऱ्यांनी घेतली.
