कोल्हापूर : राष्ट्रवादी काँग्रेसचे आमदार रोहित पवार आणि भाजप आमदार गोपीचंद पडळकर यांच्यातील राजकीय संघर्ष पुन्हा एकदा चर्चेत आला आहे. दोन्ही नेत्यांमधील शाब्दिक चकमक आणि वैयक्तिक टीका-टिपण्णी यांनी राजकीय वातावरण तापलं आहे. काही दिवसांपूर्वी रोहित पवारांच्या समर्थकांवर पडळकर यांच्या समर्थकाचं अपहरण आणि जीवे मारण्याचा प्रयत्न केल्याचा आरोप झाला होता.

या प्रकरणी सोलापुरात गुन्हा दाखल झाला असून, आरोपींना अटकही झाली आहे. या पार्श्वभूमीवर, सांगलीतील वाळवा येथील एका कार्यक्रमात रोहित पवारांनी भाजप नेते चंद्रकांत पाटील आणि माजी मंत्री जयंत पाटील यांचं कौतुक करताना पडळकरांवर “डुप्लीकेट सोनं” आणि “बेन्टेक्स” अशी खोचक टीका केली होती. याला प्रत्युत्तर देताना पडळकरांनी रोहित पवारांवर जोरदार पलटवार केला आहे.

पवारांमध्ये डुप्लीकेटपणा ठासून भरलाय

पडळकरांनी रोहित पवारांवर निशाणा साधताना म्हटलं, डुप्लीकेटपणा हा पवार कुटुंबात रुजलेला आहे. रोहित पवार हा त्याच्या आजोबांवर गेलाय. गेली पन्नास वर्षे त्यांनी पितळ सोनं म्हणून विकलं, चिंध्या विकण्याचा धंदा केला. रोहित पवारांमध्येही हाच डुप्लीकेटपणा आहे, असं गोपीचंद पडळकर म्हणाले.

पुढे म्हणाले, रोहित पवारांनी माझ्यावर टीका करणं थांबवावं. मला खरी चिंता आहे ती अजित पवारांच्या मुलाची. रोहित पवार हा औरंगजेबासारखा आहे. औरंगजेबाने सत्तेसाठी आपल्या भावाचा खून केला होता. रोहित पवारही अशीच कृती अजित पवारांच्या मुलाबरोबर करेल, असा मला संशय आहे,” असं स्फोटक वक्तव्य पडळकर यांनी केलं.

रोहित पवारांनी स्वतःचा मतदारसंघ सांभाळावा

पडळकरांनी पुढे रोहित पवारांना आव्हान देताना म्हटलं, रोहित पवारांनी माझी चिंता करणं सोडून स्वतःचा मतदारसंघ सांभाळावा. पोस्टल मतावर निवडणूक जिंकणारा हा नेता सरकारच्या नाकात दम आणतोय, असं म्हणणं हास्यास्पद आहे. मीडियात बातम्या येणं म्हणजे सरकारला आव्हान देणं नव्हे. सोन्याचा चमचा तोंडात घेऊन जन्माला आलेला हा बाळ गावात कधी जाणार? गावकऱ्यांना प्रश्न आहे, हा कधी येणार? रोहित पवार हा पिगुच्या कोंबडीसारखा आहे. त्यांनी महाराष्ट्राचा नेता होण्याच्या स्वप्नात न पडता, स्वतःची आमदारकी वाचवावी. उद्या त्यांना त्यांच्याच मतदारसंघातून निवडून येणंही कठीण होईल, असा हल्लाबोल पाडळकरांनी केला.

अजित पवार पुरून उरतील, पण…

पडळकरांनी अजित पवारांचं कौतुक करताना म्हटलं, अजित पवार रोहित पवारांना पुरून उरतील, म्हणूनच ते आज टिकले आहेत. पण मला खरी चिंता आहे ती त्यांच्या मुलाची. रोहित पवारांच्या औरंगजेबासारख्या वृत्तीमुळे त्यांच्यावर संकट येऊ शकतं. मी पवारांना उलटा-पुलटा करून पुरून उरलो आहे. रोहित पवारांच्या विरोधात मी पूर्ण ताकदीनं काम करेन. त्यांनी स्वतःच्या मतदारसंघावर लक्ष द्यावं, नाहीतर महाराष्ट्राचा नेता होण्याच्या भानगडीत त्यांची आमदारकीच धोक्यात येईल, असंही गोपीचंद पडळकर यांनी म्हटले आहे.