Pawar family : राष्ट्रवादी काँग्रेसच्या बंडानंतर राज्यातील राजकीय गणित पूर्णपणे बिघडले आहे. या बंडानंतर शरद पवार आणि अजित पवार असे दोन गट पडले. त्यानंतर बंडानंतर यंदाची पहिली दिवाळी आहे. ज्यामध्ये सगळे पवार कुटुंब एकत्र दिसून येत आहेत.

दरम्यान, काल दिवाळी पाडव्याच्या निमित्ताने गोविंदबागेत अजित पवार गैरहजर राहिल्यानंतर आज काटेवाडीत भाऊबीज साजरी करण्यासाठी सर्व पवार कुटुंबीय एकत्र जमले असल्याची माहिती समोर आली आहे.

राष्ट्रवादीच्या कार्याध्यक्ष सुप्रिया सुळे आज काटेवाडीत अजित पवार यांच्या निवासस्थनी दाखल झाल्या आहेत. याठिकाणी त्या अजित पवारांसोबत भाऊबीज साजरी करणार आहेत.

राजकीय मतभेद एका बाजुला आणि कौटुंबिक सलोखा आणि नाती एका बाजुला असे यापूर्वीही सुप्रिया सुळेंनी स्पष्ट केले होते. त्यांनी आपल्या सोशल मीडियावर काही फोटो देखील शेअर केले आहेत.

भाऊबीज निमित्त ज्येष्ठ नेते शरद पवार हे अजित पवार यांच्या काटेवाडी येथील निवासस्थानी दाखल झाले. राजकीय दृष्ट्या कितीही मतभेद झाले तरी दिवाळी सणाला पवार कुटुंब एकत्र आल्याने अनेकांच्या भुवया उंचावल्या आहेत.

शरद पवार आणि अजित पवारांच्या या भेटींमुळे राष्ट्रवादी काँग्रेसच्या दोन्ही गटांमधील नेते, पदाधिकारी आणि कार्यकर्त्यांमध्ये संभ्रमाचं वातावरण असल्याचं बोललं जात आहे.

दरम्यान, यावर राष्ट्रवादी काँग्रेसचे नेते आणि राज्याचे क्रीडा तथा युवक कल्याण मंत्री संजय बनसोडे यांनी प्रतिक्रिया दिली आहे. संजय बनसोडे म्हणाले, राजकारण वेगळं आणि नाती वेगळी असतात. नाती कधीही तुटत नाहीत आणि नाती कधीच तुटू नये असं मला वाटतं.

शरद पवार हे संपूर्ण कुटुंबाला एकसंघ ठेवण्याचं काम करत असतात. दिवाळीला एकत्र येण्याची पवार कुटुंबाची गेल्या अनेक वर्षांची परंपरा आहे. कुटुंब एकत्र ठेवण्याची गोविंदबागेची कित्येक वर्षांची परंपरा आहे. दरवर्षी दिवाळीला संपूर्ण पवार कुटुंब एकत्र येतं.

सगळे मिळून स्नेहभोजन करतात, चर्चा करतात, एकमेकांशी गप्पा मारतात. ही त्यांची अनेक वर्षांची पंरपरा आहे आणि ती कायम राहील. आम्हा आमदार आणि मंत्र्यांचा आमच्या नेत्यांवर विश्वास आहे. कुठेही संभ्रमाचं वातावरण नाही. असं देखील ते यावेळी म्हणाले.