Pavana Dam Accident – मावळ तालुक्यासह पिंपरी-चिंचवड शहराला पाणी पुरवठा करणाऱ्या पवना धरण परिसरात पर्यटनासाठी आलेल्या सहा मित्रांच्या सहलीवर बुधवारी (दि. ११) सकाळी काळाने घाला घातला. धरणाच्या जलाशयात पोहण्यासाठी उतरलेल्या एका २१ वर्षीय तरुणाचा पाण्याचा अंदाज न आल्याने बुडून दुर्दैवी मृत्यू झाला. प्रीत शिवानंद शेट्टी (रा. चिंचवड, पुणे) असे मृत तरुणाचे नाव आहे. मिळालेल्या माहितीनुसार, चिंचवड परिसरातून सहा मित्र बुधवारी सकाळी पवना धरण परिसरात फिरण्यासाठी आले होते. परिसरातील निसर्गसौंदर्याचा आनंद घेत असताना यातील काही तरुण धरणाच्या पाण्यात उतरले. मात्र पाण्याची खोली आणि प्रवाहाचा अंदाज न आल्याने प्रीत शेट्टी पाण्यात बुडू लागला. सोबतच्या मित्रांनी तात्काळ मदतीसाठी आरडाओरड केल्यानंतर स्थानिक नागरिक आणि पोलीस प्रशासनाने घटनास्थळी धाव घेत त्याला पाण्यातून बाहेर काढले. प्रीत याला तातडीने पवनानगर येथील ग्रामीण रुग्णालयात दाखल करण्यात आले. मात्र डॉक्टरांनी तपासणी करून उपचारापूर्वीच त्याचा मृत्यू झाल्याचे घोषित केले. घटनेची माहिती मिळताच लोणावळा ग्रामीण पोलीस निरीक्षक दिनेश तायडे यांच्या मार्गदर्शनाखाली पोलीस कर्मचारी नवनाथ चपटे, प्रशांत तुरे, पवन कराड, संजय पंडीत तसेच होमगार्ड भिमा वाळुंज यांनी घटनास्थळी धाव घेत मदतकार्य केले. दरम्यान, पर्यटकांनी उत्साहाच्या भरात पाण्याचा अंदाज न घेता धरणाच्या पाण्यात उतरू नये, असे आवाहन प्रशासनाकडून वारंवार करण्यात येत आहे. या घटनेमुळे परिसरात हळहळ व्यक्त करण्यात येत असून लोणावळा ग्रामीण पोलीस या प्रकरणाचा पुढील तपास करत आहेत.
