Border-Gavaskar Trophy 2024/25 :- भारत आणि ऑस्ट्रेलिया या दोन्ही संघांसाठी महत्वपूर्ण असलेली बॉर्डर- गावस्कर मालिका नोव्हेंबरमध्ये खेळविण्यात येणार आहे. या मालिकेत पाच लढती होणार आहेत. या मालिकेपूर्वीच ऑस्ट्रेलियाचा कसोटी आणि एकदिवसीय कर्णधार पॅट कमिन्सने सुमारे २ महिन्यांचा ब्रेक घेण्याचा निर्णय घेतला आहे.

एका क्रीडा वाहिनीला दिलेल्या मुलाखतीमध्ये बोलताना त्याने या गोष्टीचा खुलासा केला. जुलै महिन्यात त्याने मेजर लीग क्रिकेट स्पर्धेपासून खेळण्यास सुरुवात केली होती. परंतु केवळ सहा सामने खेळल्यानंतर त्याने आपले नाव मागे घेतले. याचबरोबरीने पुढील महिन्यात ऑस्ट्रेलियाचा संघ इंग्लंड दौऱ्यावर जाणार आहे. यात ३ टी-२० लढती व पाच एकदिवसीय लढती होणार आहेत. या दौऱ्यातून देखील पॅट कमिन्सने आपले नाव वगळले असल्याचे सांगितले.

यासंदर्भात बोलताना पॅट कमिन्स म्हणाला, मी विश्वकरंडक कसोटीच्या अंतिम सामान्यांपासून तब्बल १८ महिनांपेक्षा जास्त गोलंदाजी करत आहे. त्यामुळे थोडासा ब्रेक आवश्यक आहे. या ब्रेकदरम्यान मी गोलंदाजीपासून लांब राहील. सुमारे दोन महिन्यांच्या काळात शरीराला चांगला वेळ मिळाल्याने ते ताजेतवाने राहील. यामुळे गोलंदाजीचा वेग राखणे सोपे होऊन दुखापतीचा धोका देखील कमी होईल, असे कमिन्स म्हणाला.

Vinesh Phogat Prize Money : काय, विनेश फोगटला बक्षीस म्हणून 16 कोटी मिळाले? जाणून घ्या, व्हायरल दाव्याचे सत्य…

याआधी सन २०२३ मध्ये भारताने बॉर्डर-गावस्कर मालिकेचे यजमानपद भूषविले होते. या मालिकेत झालेल्या चार लढतींमध्ये भारताने २-१ असा विजय मिळविला होता. या हंगामातील मालिकेचे यजमानपद ऑस्ट्रेलियाकडे आहे. या मालिकेत होणारे सामने अनुक्रमे पर्थ, ॲडलेड, ब्रिस्बेन, मेलबर्न व सिडनी येथे होणार आहेत.