Parveen Babi : बॉलिवूडच्या झगमगत्या दुनियेत परवीन बॉबी यांचे नाव आजही ग्लॅमर, स्टाइल आणि बेधडक अभिनयासाठी ओळखले जाते. 70 आणि 80 च्या दशकात त्यांनी केवळ सौंदर्यामुळेच नव्हे, तर सशक्त महिला भूमिका साकारून प्रेक्षकांच्या मनावर राज्य केले. विशेषतः अमिताभ बच्चन यांच्यासोबतची त्यांची जोडी हिंदी चित्रपटसृष्टीतील सर्वाधिक गाजलेल्या जोड्यांपैकी एक मानली जाते. गुजरातमधून बॉलिवूडपर्यंतचा प्रवास परवीन बॉबी यांचा जन्म 4 एप्रिल 1949 रोजी गुजरातमधील जुनागढ येथे झाला. त्या अभ्यासात हुशार होत्या. त्यांनी इंग्रजी साहित्य विषयात पदवी घेतली होती. करिअरची सुरुवात त्यांनी मॉडेलिंगमधून केली. 1973 मध्ये ‘चरित्र’ या चित्रपटातून त्यांनी बॉलिवूडमध्ये पदार्पण केले. हा चित्रपट फारसा यशस्वी ठरला नसला, तरी परवीन यांच्या सौंदर्याने आणि आत्मविश्वासाने चित्रपटसृष्टीचे लक्ष वेधून घेतले. त्यानंतर ‘मजबूर’ या चित्रपटाने त्यांच्या कारकिर्दीला वेग दिला. अमिताभ बच्चनसोबतची गाजलेली जोडी परवीन बॉबी आणि अमिताभ बच्चन यांची जोडी प्रेक्षकांना विशेष भावली. दोघांनी मिळून ‘अमर अकबर अँथनी’, ‘नमक हलाल’, ‘काला पत्थर’, ‘शान’, ‘सुहाग’ आणि ‘दीवार’ यांसारख्या सुपरहिट चित्रपटांत काम केले. ‘अमर अकबर अँथनी’मधील परवीन यांची चुलबुली भूमिका आजही प्रेक्षकांच्या लक्षात आहे, तर ‘नमक हलाल’ आणि ‘काला पत्थर’मध्ये त्यांनी ग्लॅमरसोबत भावनिक खोलीही दाखवली. टाइम मॅगझिनच्या कव्हरवर इतिहास 1976 मध्ये परवीन बॉबींनी इतिहास घडवला. त्या टाइम मॅगझिनच्या कव्हरवर झळकणाऱ्या पहिल्या भारतीय अभिनेत्री ठरल्या. ही बाब त्यांच्या आंतरराष्ट्रीय ओळखीचा मोठा टप्पा होती. आपल्या कारकिर्दीत त्यांनी जवळपास 100 चित्रपटांत काम केले असून शशी कपूर, धर्मेंद्र, फिरोज खान, नसीरुद्दीन शाह यांसारख्या दिग्गज कलाकारांसोबतही स्क्रीन शेअर केली. वैयक्तिक आयुष्यात संघर्ष यशाच्या शिखरावर असतानाच परवीन बॉबींचे वैयक्तिक आयुष्य मात्र संघर्षमय ठरले. 1983 नंतर त्यांनी चित्रपटसृष्टीपासून दूर जाण्याचा निर्णय घेतला. मानसिक आरोग्याच्या समस्या आणि एकाकीपणामुळे त्या हळूहळू लाइमलाइटपासून दूर झाल्या. 20 जानेवारी 2005 रोजी मुंबईत त्यांचे निधन झाले. त्यांच्या जाण्याने बॉलिवूडला मोठा धक्का बसला. आजही परवीन बॉबी यांची ओळख स्टाइल आयकॉन, धाडसी अभिनेत्री आणि जागतिक स्तरावर भारताचं नाव उज्ज्वल करणारी कलाकार अशीच कायम आहे.
