प्रभात वृत्तसेवा पुणे – पुण्यात बंडगार्डन मेट्रो स्टेशनखाली एका कारचा भीषण अपघात झाला. वेगात असलेल्या कारवरील नियंत्रण सुटल्याने ती थेट मेट्रो स्टेशनच्या खांबाला आदळली. या दुर्घटनेत दोन चुलत भावांसह तिघांचा जागीच मृत्यू झाला, गाडीमध्ये मद्याची बाटली सापडल्याने हा ड्रंक ॲण्ड ड्राईव्हचा प्रकार असल्याचा प्राथमिक अंदाज पोलिसांनी वर्तवला आहे. या घटनेमुळे पोर्शे कार अपघाताची आठवण पुन्हा एकदा ताजी झाली आहे. ही संपूर्ण घटना सीसीटीव्ही कॅमेरामध्ये कैद झाली असून, हा थरारक व्हिडीओ समोर आला आहे. यश प्रसाद भंडारी (२३, रा. थेरगाव, पिंपरी चिंचवड), ऋत्विक उर्फ ओम विनायक भंडारी (२३, रा.पिंपरी गाव) आणि खुशवंत किशोर टेकवाणी (१९, रा.बीड) अशी मृतांची नावे आहेत. यश आणि ऋत्विक चुलत भाऊ आहेत. ऋत्विकने एमबीए फायनान्सचे शिक्षण घेतले असून, तो एका खासगी कंपनीत काम करतो. तर यश आयटी कंपनीत काम करतो. खुशवंत हा एमआयटी महाविद्यालयात बीटेकचे शिक्षण घेतो. त्याचा दोघांशी संबध कसा आला याचा तपास केला जात आहे. याप्रकरणी कोरेगाव पार्क पोलीस ठाण्यात गुन्हा दाखल करण्यात आला आहे. पोलीस अंमलदार रूपेश पांगारे यांनी तक्रार दाखल केली आहे.पोलिसांनी माहिती दिली की, पावणे पाचच्या सुमारास नियंत्रण कक्षाला कॉल आला होता. घटनास्थळी बंडगार्डन आणि कोरेगाव पार्क पोलीस ठाण्याचे मार्शल पोहचले. तेव्हा मेट्रोच्या खांबालगत पोलो कारचा चुराडा झालेला आढळला. पुढील सीटवरील दोघेही मृतावस्थेत आढळले. मागील सीटवरील खुशवंतची हालचाल सुरू होती. त्याला तातडीने ससून रुग्णालयात दाखल करण्यात आले. तेथे उपचारादरम्यान त्याचा मृत्यू झाला. परिसरातील मेट्रोच्या सीसीटीव्हीची पाहणी केली असता पोलो कार रुबी हॉल क्लिनिककडून बंडगार्डनच्या दिशेने भरधाव वेगाने येऊन बंडगार्डन मेट्रो स्टेशनच्या पोलला आदळलेली दिसली. गाडी पोलला धडकल्यानंतर उलटी फिरली होती. घटनास्थळी फॉरेन्सिक पथक दाखल झाले होते. गाडीचा वेग दीडशेच्या आसपास असल्याची शक्यता वर्तवली जात आहे. यश आईवडिलांचा एकुलता एक मुलगा आहे तर ऋत्विकला एक बहीण आहे. त्यांच्या कुटुंबाला घटनेने मोठा हादरा बसला आहे. दरम्यान, खुशवंतचे पालक बीडवरून पुण्यात दुपारनंतर दाखल झाले होते. आईला सांगितले पार्टीला जातोय.. यश याने आईला रात्री दहाच्या सुमारास पार्टीला जातोय असे सांगितले होते. मात्र, त्याच्या वडिलांना याची कल्पना नव्हती. जाताना त्याने सोबत ऋत्विकला घेतले. तर खुशंवतला कोठून पिकअप केले गेले हे माहिती पडले नाही. गाडी ऋत्विक चालवत असल्याने त्याच्यावर गुन्हा दाखल करण्यात आला आहे. त्यांनी पार्टी कोठे केली, तेथे मद्यपान केले का? तसेच ते बंडगार्डनच्या दिशेने कोठे निघाले होते याचा तपास केला जात असल्याची माहिती पोलीस निरीक्षक संगीता जाधव यांनी दिली. पार्टी कल्चर तरुणांच्या जीवावर बेततेय.. पोर्शेे कार अपघातानंतर पब आणि पार्टी कल्चर विषय चर्चेला आला आहे. मद्यधूंद अवस्थेत मध्यरात्री व पहाटे अनेक अपघात घडत आहेत. यामुळे पब आणि रेस्टॉरंट बारवर मध्यंतरी कारवाईचा बडगा उघडला गेला होता, यानंतरही अशा घटना घडत आहेत.
