Ajit Pawar | राज्याचे उपमुख्यमंत्री अजित पवार यांचे धाकटे पुत्र जय पवार यांचा १० एप्रिल रोजी मोठ्या थाटामाटात साखरपुडा कार्यक्रम संपन्न झाला. साखरपुड्याच्या कार्यक्रमाला खासदार सुप्रिया सुळे यांनी देखील हजेरी लावली होती. साखरपुड्याचे अनेक फोटो सोशल मीडियावर व्हायरल झाले होते. आज महात्मा फुले यांची जयंती असल्याने अजित पवार पुण्यात आले होते. जय पवारांचा साखरपुडा तर झाला आता पार्थ पवारांचा कधी असा प्रश्न पत्रकारांनी अजित दादांना विचारला. यावेळी अत्यंत मिश्किल शब्दांत अजित दादांनी उत्तर दिल्याने एकच हशा पिकला.

पार्थ दादा जय पवारांपेक्षा मोठे आहेत. मग त्यांचं लग्न कधी असा प्रश्न त्यांनी विचारण्यात आला होता. यावर काय आहे ना, जयने त्याचं लग्न ठरवलं. आता पार्थने ठरवलं की त्याचंही करू, असे उत्तर अजित पवार यांनी दिल्याने सर्वत्र हशा पिकला. पुण्यात आल्यानंतर अजित पवारांनी पुण्यातील पक्षाच्या पदाधिकारी कार्यकर्त्यांसोबत मिसळवर ताव मारला. त्यांचे धाकटे पुत्र जय पवार यांचा काल सायंकाळी ऋतुजा पाटील यांच्यासोबत साखरपुडा संपन्न झाला. या सोहळ्याचे फोटो आणि व्हिडिओ सोशल मीडियावर मोठ्या प्रमाणात शेअर करण्यात आले.

..अन् दादांच्या कृतीने सर्वांचे लक्ष वेधले 

साखरपुड्याच्या कार्यक्रमाला पवार कटुंबातील व्यक्तींनी हजेरी लावली होती. खासदार सुप्रिया सुळे यांनी देखील राजकारण बाजूला ठेवत या सोहळ्याला उपस्थित दर्शवली होती. विशेष म्हणजे नातवाच्या साखरपुडा सोहळ्याला शरद पवारांनी देखील हजेरी लावली होती. त्यांची एन्ट्री झाल्याचा व्हिडिओ सोशल मीडियावर व्हायरल होत आहे. तसेच अजित पवार, पार्थ पवार यांनी शरद पवारांचं स्वागत केलं. अजित पवारांच्या या कृतीने अवघ्या राज्याचं लक्ष वेधून घेतलं आहे.