Paris 2024 Olympics athletics : पॅरिस ऑलिम्पिक सुरू व्हायला फारसा वेळ शिल्लक राहिलेला नाही आणि त्यात आपली ताकद दाखवण्यासाठी सर्व खेळाडू सज्ज झाले आहेत. दरम्यान, भारताचा लांब उडीपटू जेसविन एल्ड्रिन आणि 5000 मीटर महिला धावपटू अंकिता ध्यानी यांनीही पॅरिस ऑलिम्पिकसाठी पात्रता मिळवली आहे.

हे दोन खेळाडू पॅरिस ऑलिम्पिकसाठी जागतिक क्रमवारीच्या कोट्यातून पात्र ठरले, ज्यामुळे भारतीय ॲथलेटिक्स संघातील सदस्यांची संख्या 30 झाली आहे. पॅरिस ऑलिम्पिक 26 जुलैपासून सुरू होणार आहे.

जागतिक ॲथलेटिक्स (WA) ने प्रकाशित केलेल्या ताज्या यादीत लांब उडीतील राष्ट्रीय विक्रम धारक एल्ड्रिन आणि धावपटू अंकिता यांचे नाव आहे. पात्र ठरूनही विविध कारणांमुळे पॅरिसमध्ये स्पर्धा न करणाऱ्या खेळाडूंबद्दल राष्ट्रीय महासंघांनी आंतरराष्ट्रीय संस्थेला माहिती दिली आहे. भारताच्या अव्वल लांब उडीपटू मुरली श्रीशंकरचे असेच उदाहरण आहे, ज्याला 8.27 मीटरच्या पात्रता मानकातून सरळ प्रवेश करूनही दुखापतीमुळे खेळातून माघार घ्यावी लागली आहे.

एल्ड्रिन या यादीत 31 व्या क्रमांकावर आहे, तर ऑलिम्पिकमध्ये 32 खेळाडू पुरुषांच्या लांब उडी स्पर्धेत भाग घेतील. अंकिता 42 व्या स्थानावर आहे जे शेवटचे स्थान आहे. 2 जुलै रोजी दोघेही पात्रता कक्षेबाहेर होते.

Grand Prix of Spain 2024 : ऑलिम्पिकपूर्वी विनेश फोगटची दमदार कामगिरी, स्पेन ग्रांप्री स्पर्धेत पटकावलं सुवर्णपदक…

ॲथलेटिक्स फेडरेशन ऑफ इंडियाच्या (एएफआय) एका उच्चपदस्थ अधिकाऱ्याने पीटीआय या वृत्तसंस्थेला सांगितले की, दोघांचाही भारतीय संघात समावेश केला जाईल. ते म्हणाले की, होय, हे दोघेही जागतिक क्रमवारीच्या आधारावर पात्र ठरले असून, ऑलिम्पिकसाठी भारतीय संघात त्यांचा समावेश केला जाईल.

भारतीय ॲथलेटिक्सचे मुख्य प्रशिक्षक राधाकृष्णन नायर यांनी 4 जुलै रोजी 28 सदस्यीय संघाची घोषणा केल्यानंतर सांगितले होते की, राष्ट्रीय महासंघाच्या निवड समितीने निर्णय घेतला आहे की जो यानंतरही पॅरिस गेम्ससाठी पात्र ठरेल त्याला संघात समाविष्ट केले जाईल.