NEET Paper Leak Case 2026 : देशभरात गाजलेले युजी नीट पेपरफुटी २०२६ या प्रकरणात अनेक धक्कादायक बाबी समोर आल्या होत्या. ज्यांनी मुलांना शिक्षणाचे धडे द्यायला हवे होते त्यांनीच नीटचा पेपर फोडला. या घटनेने देशभरात विद्यार्थ्यांसह पालकांमध्ये संतापाची लाट उसळली होती.

पेपरफुटी प्रकरणात तीन मास्टरमाइंडपर्यंत पोहचण्यासाठी एका तरुणाची मदत झाली. त्याच्या माध्यमातूनच या पेपरफुटी साखळीचा पर्दाफाश करण्यात सीबीआयला यश आलं. सीबीआयने २८ जुलै रोजी विशेष न्यायालयात ९४ पानी दाखल केलेल्या दोषारोपपत्रात या तीन आरोपींची भूमिका काय होती याविषयी माहिती दिली आहे.

या प्रकरणात एकूण १३ जणांवर गुन्हा दाखल करण्यात आला होता. राष्ट्रीय परीक्षा संस्थेच्या (एनटीए) पी. व्ही. कुलकर्णी (रसायनशास्त्र), मनीषा हवालदार (भौतिकशास्त्र), मनीषा मांढरे (वनस्पतिशास्त्र, प्राणीशास्त्र) या तीन विषय तज्ज्ञांचा नीट-यूजी २०२६ च्या पेपरमधील प्रश्नांची माहिती फोडण्यात सर्वात मोठा हात आहे असा दावा केंद्रीय गुन्हे अन्वेषण म्हणजेच सीबीआयने आरोपपत्रात केला आहे.

सुरक्षेतील गंभीर त्रुटीही समोर

तपासात सीबीआयने पुण्यातील आरोपी पी. व्ही. कुलकर्णी याच्या सोसायटीतील प्रवेश-नियंत्रण अॅपमधील नोंदी, बायोमेट्रिक माहिती, मोबाइल कॉल डिटेल रेकॉर्ड व लोकेशन विश्लेषणाचा महत्त्वाचा आधार घेण्यात आला आहे. तसेच राष्ट्रीय परीक्षा संस्थेच्या सुरक्षेतील गंभीर त्रुटीही समोर आल्या आहेत. गोपनीय विभागासाठी स्वतंत्र थेट रेकॉर्डींग कंट्रोल युनीट नव्हतं. त्यामुळे या प्रकरणात आरोपी असलेल्या तज्ज्ञांच्या हालचालींवर कोणाचेही लक्ष नव्हते. ही बाब चौकशीत उघडकीस आली आहे.

वनस्पतिशास्त्रासाठी इंग्रजी-मराठी भाषांतर आणि प्राणिशास्त्रासाठी पुनर्भाषांतराची जबाबदारी मनीषा मांढरे हिच्याकडे होती. भौतिकशास्त्राच्या भाषांतराची जबाबदारी असलेल्या मनीषा हवालदार ही प्रत्येक दिवसाचे काम संपल्यानंतर दिल्लीतील निवासस्थानी परतल्यावर प्रश्नांची संक्षिप्त नोंद करून ठेवत असल्याचे तपासात आढळले आहे.

दोषारोपपत्रानुसार, पी. व्ही. कुलकर्णी, मनीषा मांढरे, मनीषा हवालदार या आरोपींनी फोडलेली प्रश्नपत्रिका पुण्यातील ब्युटिशियन मनीषा वाघमारे हिने राजस्थान व हरयाणापर्यंत पोहोचविल्याचा दावा सीबीआयने केला आहे. ही प्रश्नपत्रिका मध्यस्थांमार्फत इतरांपर्यंत पोहचवल्याचं निषप्न झालं आहे.

या साखळीतील एका विद्यार्थ्याच्या माध्यमातूनच या रॅकेटचं बिंग फुटलं. लातूर येथील कोचिंग सेंटर चालक शिवराज मोटेगावकर याचाही आरोपी म्हणून समावेश करण्यात आला आहे. सीबीआयने म्हटले आहे की, प्रश्नपत्रिका अंतिम करण्याच्या विविध टप्प्यांवर त्याच त्याच व्यक्तींचा सहभाग होता.

Rishabh Pant: “कृपया मदत करा, गेल्या 3 वर्षांपासून…” ऋषभ पंतची मुख्यमंत्र्यांकडे मदतीची हाक