Rishabh Pant : भारतीय क्रिकेटपटू ऋषभ पंतने सोशल मिडियावर एक पोस्ट शेअर करत उत्तराखंडचे मुख्यमंत्री पुष्कर सिंह धामी यांच्याकडे मदतीची मागणी केली आहे. उत्तराखंडमध्ये जमीन खरेदी करण्याचा प्रयत्न गेल्या तीन वर्षांपासून सुरू असल्याचं पंतने सांगितलं आहे.

ऋषभ पंतला दिल्लीहून उत्तराखंडमध्ये स्थायिक व्हायचे आहे मात्र त्यासाठी त्याला अनेक अडचणींचा सामना करावा लागत असल्याने त्याने आता मुख्यमंत्री पुष्कर सिंह धामी यांच्याकडे मदत मागितली असल्याची माहिती या पोस्टमध्ये दिली आहे.

ऋषभ पंतने आपल्या पोस्टमधून उत्तराखंडशी असलेलं भावनिक नातंही व्यक्त केलं. महत्त्वाची बाब म्हणजे त्याने कोणत्याही प्रकारची मोफत जमीन किंवा सरकारी भेट मागितलेली नाही. त्याने स्पष्ट केलं की, जर सरकारची परवानगी मिळाली तर तो सरकारी दरानेच जमीन खरेदी करण्यास तयार आहे.

@pushkardhami hello sir how’s you ??? It’s a long time for me especially being local from Uttrakhand . I have been trying to buy land to shift my base from Delhi to Uttrakhand and I couldn’t find anything facilitating and big to live here I love my Uttrakhand. My humble request…

— Rishabh Pant (@RishabhPant17) August 7, 2026

मी मूळचा उत्तराखंडचा…

ऋषभ पंतने एक्सवर मुख्यमंत्री पुष्कर सिंह धामी यांना पोस्ट टॅग करत लिहिले की, “नमस्कार सर, कसे आहात? मी मूळचा उत्तराखंडचा आहे आणि बऱ्याच काळापासून माझे घर दिल्लीहून उत्तराखंडला हलवण्याचा प्रयत्न करत आहे. मला राहण्यासाठी योग्य आणि मोकळा प्लॉट मिळत नाही. माझे उत्तराखंडवर खूप प्रेम आहे. कृपया मला जमीन मिळवून देण्यात मदत करावी, अशी मी विनंती करतो, कारण ही प्रक्रिया खूप कठीण झाली आहे. माझ्या राज्याचा प्रचार केल्याबद्दल मला जी जमीन मिळायला हवी होती, ती सुद्धा मला अजून मिळालेली नाही.

इतर सर्व गोष्टी बाजूला ठेवून, मला फक्त माझ्या घरी परत यायचे आहे आणि उत्तराखंडच्या विकासात योगदान द्यायचे आहे. मला डोंगराळ भागातील माझ्या लोकांकडे परत जायचे आहे. कृपया या प्रकरणाकडे लक्ष द्यावे. तीन वर्षे झाली आहेत आणि मला अजूनही जमीन मिळालेली नाही. मी आपल्या प्रतिसादाची वाट पाहत आहे.” असे म्हणत पंत याने मुख्यमंत्र्यांकडे मदतीची हाक मागितली आहे.

विशेष म्हणजे अलिकडेच ऋषभ पंत हा उत्तराखंडमधील सर्वाधिक वैयक्तिक कर भरणारा व्यक्ती ठरला आहे. पंतने गेल्या आर्थिक वर्षात सुमारे २३.८४ कोटी रुपये कर भरला.

भारतीय संघ सध्या श्रीलंका दौऱ्यात व्यस्त 

भारतीय संघासह ऋषभ पंत सध्या श्रीलंका दौऱ्यावर आहे. 15 ऑगस्टपासून गाले येथे भारत आणि श्रीलंका यांच्यात दोन सामन्यांची कसोटी मालिका सुरू होणार असून, त्याआधी भारतीय संघ श्रीलंका XI विरुद्ध सराव सामना खेळत आहे. अशा महत्त्वाच्या क्रिकेट घडामोडींच्या पार्श्वभूमीवर पंतने केलेली ही पोस्ट चर्चेचा विषय ठरली आहे.

हेही वाचा: 

Top 10 News: राष्ट्रवादीत पुन्हा वाद? ते ऋषभ पंतची मुख्यमंत्र्यांकडे मदतीची हाक; जाणून घ्या आजच्या Top 10 News…