Pankaja Munde । IAS Pooja Khedkar : मागच्या काही दिवसांपासून मोठ्या प्रमाणात चर्चेत असलेल्या वादग्रस्त IAS अधिकारी पूजा खेडकर मागच्या काही दिवसांपासून वादाच्या भोवऱ्यात अडकल्या आहेत. त्यांच्या अडचणींमध्ये दिवसेंदिवस वाढ होताना दिसत आहे. पूजा खेडकर यांची सरकारकडून पुण्याहून वाशिमला बदली करण्यात आली आहे. मागच्या काही दिवसांपासून वादाच्या भोवऱ्यात अडकलेल्या पूजा खेडकर या प्रकरणाशी भाजप नेत्या पंकजा मुंडे यांचं नाव जोडलं जाऊ लागलं आहे. यामुळे पंकजा मुंडे संतप्त झाल्या असून त्यांनी असा कोणताही संबंध नसल्याचं स्पष्टीकरण दिलं आहे. तसेच, असा आरोप करणाऱ्यांविरोधात कायदेशीर पाऊल उचलणार असल्याचंही त्या म्हणाल्या आहेत. एका प्रसिद्ध माध्यमाशी बोलताना पंकजा मुंढे यांनी आपली बाजू मांडली. पूजा खेडकर यांच्या आई मनोरमा खेडकर पिस्तुल हातात घेऊन गावकऱ्यांना दमदाटी केल्याचा व्हिडीओ व्हायरल झाल्यामुळे चर्चेत आहेत. त्यात पंकजा मुंडेंनी पूजा खेडकर यांचे वडील दिलीप खेडकर यांच्याकडून पैशांचा चेक स्वीकारल्याचा दावा केला जात आहे. पंकजा मुंडेंनी ट्रस्टसाठी हा चेक स्वीकारल्याचाही आरोप केला जात आहे. यावर आता पंकजा मुंडे यांनी स्पष्टीकरण दिलं आहे. यावेळी बोलताना पंकजा मुंडे म्हणाल्या की, “पूजा खेडकर प्रकरणाशी माझा कोणाताही संबंध नाही. खेडकर कुटुंबाने पंकजा मुंडे यांच्या संस्थेला चेक दिल्याच्या बातम्या खोट्या, चुकीच्या आहेत. हा खोडसाळपणा आहे” असं पंकजा मुंडे यांनी स्पष्ट केलय. ‘गोपीनाथ मुंडे प्रतिष्ठानला कधी जमलं, तर मी मदत करते, मी पैसे देते. माझ्यावर झालेल्या या आरोपांमुळे मी व्यथित आहे. मी लोकांच्या आनंदात होते. हा आनंद काहींना पहावला नाही” असं पंकजा मुंडे म्हणाल्या. “एवढ्या मोठ्या व्यक्तीविषयी बोलताना खूप सपोर्ट असला पाहिजे किंवा तुम्हाला मला डॅमेज करायचा असेल. खात्री न करता ही बातमी दिली, हे मी सहन करु शकत नाही. मी गोपीनाथ मुंडे प्रतिष्ठानच्या नावावर कधी एक रुपया घेतलेला नाही. मी काय पाच वर्षं मंत्री आहे का? माझ्या कारखान्यांवर जप्तीच्या कारवाया होतात. मी माझ्याच अडचणींमध्ये आहे. मी या गोष्टी कोणत्या अधिकारांत करू शकते? आणि मी का करू हे?” असा सवालही त्यांनी केला. त्या पुढे म्हणाल्या, लोकसभेला निवडून येताना माझी स्वत:ची दमछाक झाली. असं असताना मी मुख्यमंत्री, प्रधानमंत्रीपेक्षा मोठी आहे का? एका व्यक्तीला बोगसपणे IAS करु शकते. यात लॉजिक आहे का? माझ्याकडे उद्या जरी शक्ती असेल, तरी असं करणार नाही. असं देखील मुंडे यावेळी म्हणाल्या.
