Ashadhi Wari 2026 : आषाढी एकादशी सोहळ्यासाठी पंढरपुरात येणाऱ्या लाखो वारकऱ्यांचा विठ्ठल दर्शनाचा प्रवास अधिक सुलभ आणि सुकर होणार आहे. यंदा आषाढी यात्रेच्या पार्श्वभूमीवर 10 जुलै 2026 पासून विठ्ठल-रुक्मिणीचे व्हीआयपी दर्शन पूर्णपणे बंद करण्याचा मोठा निर्णय राज्य शासनाने घेतला आहे. (Ashadhi Wari 2026)

तसेच भाविकांच्या सुरक्षेसाठी आणि गर्दीच्या नियोजनासाठी मंदिर परिसर नो-व्हेईकल झोन करण्यात येणार आहे, अशी माहिती ग्रामविकास आणि पंचायत राजमंत्री जयकुमार गोरे यांनी दिली. (Ashadhi Wari 2026)

आषाढी एकादशीनिमित्त पंढरपुरात संपूर्ण महाराष्ट्रातून आणि शेजारील राज्यांतून लाखो भाविक विठुरायाच्या दर्शनासाठी पायी चालत येतात. अनेकदा व्हीआयपी दर्शनामुळे दर्शनाची रांग थांबवली जाते, ज्यामुळे तास-न्-तास रांगेत उभे राहणाऱ्या सामान्य वारकऱ्यांना मोठा त्रास सहन करावा लागतो. (Ashadhi Wari 2026)

हाच त्रास कमी करण्यासाठी आणि कमीत कमी वेळेत भाविकांना विठुरायाचे दर्शन घडावे, यासाठी 10 जुलैपासून व्हीआयपी दर्शन व्यवस्था पूर्णपणे थांबवली जाणार आहे. आता सर्वांना एकाच रांगेतून माऊलीचे दर्शन घ्यावे लागेल. (Ashadhi Wari 2026)

आषाढी वारीदरम्यान पंढरपूर शहरात, विशेषतः मंदिर परिसरात होणारी वाहतूक कोंडी आणि भाविकांची सुरक्षितता लक्षात घेऊन मंदिर परिसर नो-व्हेईकल झोन (वाहनांना बंदी असलेला परिसर) घोषित करण्यात आला आहे. यामुळे भाविकांना कोणत्याही वाहनांच्या अडथळ्याशिवाय आणि अपघाताच्या भीतीशिवाय मंदिर परिसरात फिरता येईल. (Ashadhi Wari 2026)