Pak GDP : पाकिस्तानची अर्थव्यवस्था चालू आर्थिक वर्षात (2025- 26) 3.7 टक्क्यांनी वाढून 456 अब्ज डॉलर्सची झाली आहे. महाराष्ट्राची अर्थव्यवस्था 560 अब्ज डॉलरची आहे तर भारताची अर्थव्यवस्था 4150 अब्ज डॉलरची आहे. 4 टक्क्यांचे मूळ लक्ष्य चुकले असले तरी, ही वाढ चार वर्षांतील सर्वाधिक होती, असे अर्थमंत्री मुहम्मद औरंगजेब म्हणाले.

शुक्रवारी अर्थसंकल्प सादर करण्यापूर्वी पत्रकार परिषदेत आर्थिक वर्ष 2025-26 साठीच्या आर्थिक सर्वेक्षणाचे अनावरण करताना, औरंगजेब यांनी दावा केला की पाकिस्तानची आर्थिक वाढ 3.1 टक्क्यांच्या जागतिक आर्थिक वाढीपेक्षा जास्त आहे. पाकिस्तानचे चालू आर्थिक वर्ष 30 जून रोजी संपत आहे.

आर्थिक वर्ष 2023 मध्ये जीडीपी वाढ -0.2 टक्के, आर्थिक वर्ष 2024 मध्ये 2.6 टक्के आणि आर्थिक वर्ष 2025 मध्ये 3.2 टक्के होती. 4 टक्के वाढीचे उद्दिष्ट पूर्ण न होण्यामागील कारण स्पष्ट करताना ते म्हणाले की, पश्चिम आशियातील सुरू असलेला संघर्ष हे त्याचे कारण आहे.

परंतु असे असले तरी, पाकिस्तानी अर्थव्यवस्था 456 अब्ज डॉलर्स या ऐतिहासिकदृष्ट्या उच्च पातळीवर पोहोचवली आहे, असे ते म्हणाले. वित्तीय तूट गेल्या वर्षीच्या याच कालावधीतील जीडीपीच्या 2.6 टक्क्यांवरून कमी होऊन जीडीपीच्या 0.7 टक्क्यांवर आली आहे.

कर महसुलात 10.1 टक्क्यांनी वाढ झाली आहे. परकीय चलन साठा 17 अब्ज डॉलर्सपेक्षा जास्त आहे, परंतु 30 जून रोजी संपणार्‍या आर्थिक वर्षापर्यंत तो 18 अब्ज डॉलर्सपर्यंत पोहोचेल, जे तीन महिन्यांच्या आयातीइतके असेल. भारताकडील परकीय चलन साठा 682 अब्ज डॉलर आहे.

गेल्या महिन्यात पाकिस्तानला विक्रमी 4.3 अब्ज डॉलर्सची परकीय चलन आवक मिळाली, ज्यामुळे पहिल्या 11 महिन्यांत ही आवक 33 अब्ज डॉलर्सच्या पुढे गेली आहे. कृषी क्षेत्रात 2 टक्क्यांच्या उद्दिष्टाच्या तुलनेत 2.89 टक्के वाढ नोंदवली गेली, परंतु ती मागील आर्थिक वर्षातील 1.53 टक्क्यांच्या तुलनेत जास्त आहे.