लाहोर :- पाकिस्तान क्रिकेट बोर्ड (पीसीबी) आपल्या क्रिकेटपटूंच्या पगारात ऐतिहासिक वाढ करणार आहे. नवीन सेंट्रल कॉन्ट्रॅक्‍टमध्ये बाबर आझम, मोहम्मद रिझवान आणि शाहीन शाह आफ्रिदी “अ’ ग्रेड कॉन्ट्रॅक्‍टमध्ये राहू शकतात. त्यांना दरमहा 45 लाख पाकिस्तानी रुपये (सुमारे 13.22 लाख भारतीय रुपये) मिळतील. म्हणजेच त्यांचा वार्षिक करार सुमारे दीड कोटी रुपयांचा होणार आहे.

भारताच्या तुलनेत पाकिस्तानच्या अव्वल खेळाडूंचा पगार अजूनही खूपच कमी आहे. बीसीसीआय आपल्या “अ’ श्रेणीतील खेळाडूंना वर्षाला 7 कोटी रुपये देते. यामध्ये विराट कोहली, रोहित शर्मा, जसप्रीत बुमराह आणि रवींद्र जडेजा यांचा समावेश आहे.

पाकिस्तानचे बहुतेक केंद्रीय करार असलेले खेळाडू अनेक देशांच्या फ्रेंचायझी लीगमध्ये भाग घेतात. या लीगमधील खेळाडू मध्यवर्ती करारापेक्षा अधिक कमाई करत असत. पीसीबी कमी पैसे देऊनही आपल्या खेळाडूंना आंतरराष्ट्रीय आणि देशांतर्गत क्रिकेट खेळायला लावत असे. याविरोधात अनेक दिवसांपासून खेळाडू आंदोलन करत होते, त्यामुळेच पीसीबी आता आपल्या खेळाडूंच्या कमाईत ऐतिहासिक बदल करणार आहे.

खेळाडूंची 4 श्रेणींमध्ये विभागणी….

याआधीच्या करारात पाकिस्तानकडे लाल आणि पांढऱ्या चेंडूने खेळणारे खेळाडू असे दोन प्रकार होते. हे आता काढले जाऊ शकतात. आता पीसीबीही भारतीय क्रिकेट बोर्डाप्रमाणे खेळाडूंना 4 ग्रेडमध्ये विभागणार आहे. यामध्ये अ, ब, क आणि ड श्रेणींचा समावेश असेल. पीसीबीने गेल्या वर्षी केंद्रीय करारात 33 क्रिकेटपटूंचा समावेश केला होता. यावेळी क्रिकेटपटूंच्या संख्येची माहिती समोर आलेली नाही.

आयसीसीकडून पीसीबीला आणखी रसद…

इंटरनॅशनल क्रिकेट कौन्सिलने (आयसीसी) देखील अलीकडेच त्याचे महसूल मॉडेल अपग्रेड केले आहे. या अंतर्गत पीसीबीला एका वर्षासाठी 960 कोटी पाकिस्तानी रुपये ( 282 कोटी) मिळतील. जे गेल्या वर्षीच्या तुलनेत जवळपास दुप्पट आहे.