चंदीगड : गेल्या वर्षी १० सप्टेंबर रोजी चंदीगडमधील सेक्टर १० मधील एका बंगल्यात झालेल्या हँडग्रेनेड स्फोटाच्या प्रकरणात एनआयएने अनेक मोठे खुलासे केले आहेत. एनआयएने विशेष न्यायालयात आरोपपत्र दाखल केले आहे. या आरोपपत्रात असे म्हटले आहे की, त्यावेळी घरात झालेल्या स्फोटासाठी वापरण्यात आलेला हातबॉम्ब पाकिस्तानमध्ये बनवण्यात आला होता. पाकिस्तानमध्ये बनवलेले एचजी-84 या जातीचे ते बाॅम्ब होते. एनआयएने पाकिस्तानस्थित दहशतवादी हरविंदर सिंग रिंडा आणि अमेरिकेतून कार्यरत असलेला गँगस्टरमधून दहशतवादी बनलेला हॅपी पासियान यांनाही आरोपी म्हणून समाविष्ट केले आहे. या दोन्ही दहशतवाद्यांच्या सांगण्यावरून हा गुन्हा करण्यात आला होता. ड्रोनद्वारे पंजाबमार्गे पाकिस्तानातून चंदीगडला हातबॉम्ब पाठवले जाण्याची शक्यता आहे. या प्रकरणात, एनआयएने न्यायालयात आरोपपत्र दाखल केले आहे आणि आता या प्रकरणाची पुढील सुनावणी १५ एप्रिल रोजी होणार आहे. चंदीगडच्या सेक्टर १० मधील एका बंगल्यावर ऑटोमधून आलेल्या काही लोकांनी ग्रेनेड फेकून हल्ला केला होता. आता या प्रकरणाच्या तपासादरम्यान असा दावा करण्यात आला आहे की, या घटनेतील लक्ष्य पंजाबचे निवृत्त एसपी होते. त्यांनी दहशतवादाशी संबंधित प्रकरणांचा तपास केला होता.
