Pakistan News – पाकिस्तानातील पंजाब प्रांतात लाहोर शहरात बांधकाम सुरू असलेल्या इमारतीचे छत कोसळून किमान १४ विद्यार्थी ठार झाले आणि अन्य २० जण जखमी झाले आहेत. या इमारतीमध्ये एक खासगी क्लास सुरू होता.

दाट लोकवस्ती असलेल्या कहना नाऊ भागात असलेल्या या इमारतीमधील या क्लासला ७ ते १३ वर्षे वयोगटातील ३० मुले उपस्थित होते. इमारतीचे छत कोसळल्यामुळे अनेक जण ढिगाऱ्याखाली गाडले गेल्याचे पोलिसांनी सांगितले.

आतापर्यंत ढिगाऱ्याखालून १४ मृतदेह बाहेर काढण्यात आले असल्याचे लाहोरचे पोलीस उपमहानिरीक्षक (ऑपरेशन्स) फैजल कामरान यांनी पत्रकारांना सांगितले.

जखमी झालेले २० मुले आणि शिक्षिकेला रुग्णालयात दाखल करण्यात आले आहे. ढिगाऱ्याखाली अडकलेल्या उर्वरित पीडितांचा शोध घेण्याचे प्रयत्न बचाव पथकांकडून सुरू आहे.

या इमारतीच्या काही भागाचे बांधकाम सुरू आहे. छत कोसळले, तेंव्हा मजूर या बांधकामाच्या कामात व्यस्त होते. या बांधकामाच्या कंत्राटदाराला अटक करण्यात आली आहे, असे कामरान यांनी सांगितले.

पंजाबच्या मुख्यमंत्री मरियम नवाज यांनी पोलीस आणि जिल्हा प्रशासनाला इमारत कोसळण्यास जबाबदार असलेल्यांना ओळखून त्यांच्याविरुद्ध फौजदारी कारवाई सुरू करण्याचे निर्देश दिले.

जखमींवर वेळेवर उपचार मिळावेत, यासाठी पंजाब प्रांताच्या आरोग्य प्रशासनाने लाहोर जनरल हॉस्पिटलमध्ये वैद्यकीय आणिबाणी घोषित केली आहे.