Pakistan : पाकिस्तानस्थित दहशतवादी संघटना जैश-ए-मोहम्मद आता महिलांना दहशतवादी बनवण्याच्या तयारीत आहे. या संघटनेचा सरगना मसूद अझहर सध्या भूमिगत अवस्थेत असून त्याने या नव्या मिशनची जबाबदारी स्वतःच्या बहिणीला दिली आहे. महिलांना प्रशिक्षण देण्यासाठी मसूदच्या बहिणीने ‘तुफत-अल-मुमिनात’ नावाचा जिहादी कोर्स सुरू केला आहे. या कोर्सच्या माध्यमातून सर्वप्रथम महिलांचा ‘माइंडवॉश’ म्हणजेच विचारप्रवाह बदलण्यावर भर दिला जात आहे. महिलांना दहशतवादी बनवण्यामागचा हेतू काय? पाकिस्तानमध्ये महिला दहशतवाद्यांची परंपरा नवीन नाही. यापूर्वीही अनेक संघटनांनी महिलांना दहशतवादात उतरवण्याचा प्रयत्न केला आहे. बलुच लिबरेशन आर्मी (BLA) ची महिला ब्रिगेड आणि खैबर प्रांतातील तहरीक-ए-तालिबान पाकिस्तान (TTP) ची महिला युनिट अत्यंत सक्रिय आणि घातक ठरली आहे. महिला दहशतवादी सुसाईड बॉम्बर्सची भूमिकाही पार पाडतात. त्यामुळे जवळपास संपुष्टात आलेल्या जैश संघटनेला पुन्हा जिवंत करण्यासाठी मसूद अझहर काही मोठी कारवाई करण्याच्या तयारीत असल्याचे संकेत आहेत. महिलांना पुढे करून तो आपल्या नापाक योजनेला लवकर आणि सोप्या मार्गाने पूर्ण करण्याच्या प्रयत्नात आहे. भारताच्या गुप्तचर संस्थांनी मसूदचे ठिकाणे ओळखली आहेत. ‘ऑपरेशन सिंदूर’दरम्यान मसूदच्या तीन ठिकाणांवर हल्ला झाला होता, ज्यात त्याच्या कुटुंबातील 14 जण ठार झाले. त्यामुळे आता तो महिलांना पुढे करून नव्या पद्धतीने संघटना पुन्हा उभी करण्याचा प्रयत्न करीत असल्याचं दिसून येत आहे. सध्या जैश-ए-मोहम्मद हा पाकिस्तानातील सर्वात कमकुवत दहशतवादी संघटनांपैकी एक आहे. पाकिस्तानमध्ये टीटीपी आणि बीएलएसारख्या संघटनांमध्ये मोठ्या प्रमाणात युवक सहभागी होत आहेत. त्यामुळे मसूद आपल्या संघटनेची ताकद वाढवण्यासाठी महिलांना समाविष्ट करत असल्याचे दिसून येत आहे. पाकिस्तानमध्ये 200 हून अधिक महिला दहशतवादी : काउंटर टेररिझम डिपार्टमेंट (CTD) पाकिस्तानच्या अहवालानुसार, केवळ खैबर प्रांतात 67 महिला दहशतवादी सक्रिय आहेत, तर संपूर्ण पाकिस्तानमध्ये त्यांची संख्या 200 च्या वर गेली आहे. केवळ बलुचिस्तानमध्ये 2024 मध्ये महिला दहशतवाद्यांनी 15 हल्ले केल्याची नोंद आहे. सध्याच्या घडीला पाकिस्तानमध्ये त्या महिलाच दहशतवादी बनतात ज्यांच्या कुटुंबात कोणी सदस्य नसतो किंवा ज्यांना शासन आणि समाजव्यवस्थेकडून अन्याय व छळ सहन करावा लागतो. पाकिस्तानातील प्रमुख दहशतवादी संघटना : सध्या पाकिस्तानमध्ये लष्कर-ए-तोयबा, जैश-ए-मोहम्मद, हिजबुल मुजाहिद्दीन, तहरीक-ए-तालिबान यांसारख्या किमान 80 दहशतवादी संघटना सक्रिय आहेत. या सर्व संघटनांचा मुख्य उद्देश एकच आहे, ‘जिहाद’च्या नावाखाली दहशत पसरवणे.
