Pakistan News: पवित्र रमझान महिन्याच्या पहिल्याच दिवशी पाकिस्तानातून एक अत्यंत हृदयद्रावक घटना समोर आली आहे. कराचीमधील सोल्जर बाजार परिसरात सेहरीसाठी जेवण बनवत असताना गॅस सिलिंडरचा भीषण स्फोट झाला. या स्फोटाची तीव्रता इतकी मोठी होती की, निवासी इमारतीचा काही भाग कोसळला. या भीषण दुर्घटनेत १६ जणांचा मृत्यू झाला असून, मृतांमध्ये ८ निष्पाप बालकांचा समावेश आहे. पहाटेच्या वेळी काळाचा घाला – मिळालेल्या माहितीनुसार, ही घटना पहाटे ४:१५ च्या सुमारास घडली. रमझानचा पहिला उपवास (रोझा) धरण्यासाठी मुस्लिम बांधव पहाटे ‘सेहरी’ची तयारी करत होते. याच वेळी गॅस गळतीमुळे मोठा स्फोट झाला. या स्फोटामुळे इमारतीचा एक मोठा हिस्सा कोसळला आणि काही कुटुंब मलब्याखाली गाडली गेली. पोलीस आणि बचाव पथके घटनास्थळी दाखल झाली, त्यांनी मलब्याखाली अडकलेल्यांना बाहेर काढले. जखमींना तात्काळ जवळच्या रुग्णालयात दाखल करण्यात आले असून मृतांचा आकडा वाढण्याची भीती व्यक्त केली जात आहे. हेही वाचा – पंतप्रधान रहमान यांची हिंदूंसाठी मोठी घोषणा केली राष्ट्रपतींनी व्यक्त केला शोक – पाकिस्तानचे राष्ट्रपती आसिफ अली झरदारी यांनी या घटनेवर दुःख व्यक्त केले आहे. त्यांनी पीडित कुटुंबांच्या प्रती संवेदना व्यक्त करत, जखमींना सर्वोत्तम वैद्यकीय उपचार देण्याचे आदेश प्रशासनाला दिलेत. तसेच, गॅस सिलिंडरच्या सुरक्षिततेची तपासणी करावी, अशा सूचनाही त्यांनी दिल्या आहेत. दरम्यान, पाकिस्तानात अशा प्रकारच्या गॅस अपघातांची मालिका थांबताना दिसत नाही. गेल्या वर्षी, जुलै २०२५ मध्ये इस्लामाबादमध्ये एका लग्नाच्या रिसेप्शन दरम्यान असाच गॅस स्फोट झाला होता, ज्यामध्ये नवरदेव-नवरीसह आठ जणांचा मृत्यू झाला होता. या ताज्या घटनेने पुन्हा एकदा सिलिंडर सुरक्षेचा प्रश्न ऐरणीवर आणला आहे.
