Pakistan Terror Attack : पाकिस्तानातील खैबर पख्तूनख्वा प्रांतातील अफगाणिस्तान सीमेलगतच्या हंगू जिल्ह्यात दहशतवाद्यांनी पोलीस चौकीवर मोठा हल्ला चढवला. स्फोटकांनी भरलेल्या क्वाडकॉप्टर (ड्रोन) आणि जड शस्त्रास्त्रांचा वापर करून करण्यात आलेल्या या हल्ल्यात किमान 11 पोलीस कर्मचाऱ्यांचा मृत्यू झाला, तर 28 जण जखमी झाले. या आठवड्यात पाकिस्तानच्या सुरक्षा दलांवर झालेला हा दुसरा मोठा दहशतवादी हल्ला आहे.

स्फोटकांनी भरलेल्या ड्रोनने हल्ला –

रॉयटर्सच्या वृत्तानुसार, दहशतवाद्यांनी सुरुवातीला स्फोटकांनी भरलेल्या क्वाडकॉप्टरच्या साहाय्याने पोलीस चौकीला लक्ष्य केले. त्यानंतर जड शस्त्रांनी सज्ज दहशतवाद्यांनी चौकीवर थेट हल्ला चढवला. अनेक तास सुरू असलेल्या चकमकीत सुरक्षा दलांनी 15 दहशतवाद्यांना ठार केल्याचा दावा केला असला, तरी या कारवाईत पोलिसांचेही मोठे नुकसान झाले.

डीएसपींसह 11 पोलीस शहीद –

अल जझीराच्या वृत्तानुसार, मृतांमध्ये डेप्युटी सुपरिंटेंडंट ऑफ पोलिस (डीएसपी) दियार खान यांचाही समावेश आहे. अतिरिक्त पोलीस फौजेसह घटनास्थळी पोहोचल्यानंतर त्यांनी दहशतवाद्यांविरुद्ध लढताना प्राणांची आहुती दिली. जखमी झालेल्या 28 पोलीस कर्मचाऱ्यांवर रुग्णालयात उपचार सुरू आहेत.

अफगाणिस्तानवर पाकिस्तानचे आरोप –

या हल्ल्यानंतर पाकिस्तानने पुन्हा एकदा अफगाणिस्तानवर गंभीर आरोप केले आहेत. रॉयटर्सनुसार, अफगाणिस्तान आपल्या हद्दीत दहशतवादी तळांना आश्रय देत असून, पाकिस्तानात हल्ले करण्यासाठी त्यांना प्रशिक्षण दिले जात असल्याचा दावा पाकिस्तानने केला आहे.

मात्र, अफगाणिस्तानातील तालिबान सरकारने हे आरोप फेटाळून लावत दहशतवाद ही पाकिस्तानची अंतर्गत समस्या असल्याचे म्हटले आहे.

ड्रोनद्वारे वाढत आहेत दहशतवादी हल्ले –

रॉयटर्सच्या माहितीनुसार, पाकिस्तान-अफगाणिस्तान सीमेलगत कार्यरत दहशतवादी संघटना अलीकडील काही महिन्यांत आयईडी (Improvised Explosive Device) बसवलेल्या क्वाडकॉप्टरचा वापर करून पोलीस चौक्यांवर हल्ले करत आहेत. मात्र, हंगू येथील या ताज्या हल्ल्याची जबाबदारी अद्याप कोणत्याही संघटनेने स्वीकारलेली नाही.

काही दिवसांपूर्वीही झाला होता मोठा हल्ला –

हंगूमधील हल्ल्यापूर्वी काही दिवसांपूर्वीच खैबर पख्तूनख्वा प्रांतातील टँक जिल्ह्यात आत्मघाती बॉम्बस्फोट झाला होता. या हल्ल्यात 15 जणांचा मृत्यू झाला होता. त्यामध्ये 12 पाकिस्तानी सैनिकांचा समावेश होता. त्या हल्ल्याची जबाबदारी तहरीक-ए-तालिबान पाकिस्तान (टीटीपी) या संघटनेने स्वीकारली होती.

राष्ट्रपती आणि पंतप्रधानांकडून निषेध –

हंगूतील दहशतवादी हल्ल्याचा पाकिस्तानचे राष्ट्रपती आसिफ अली झरदारी आणि पंतप्रधान शहबाज शरीफ यांनी तीव्र निषेध केला आहे. पीटीआय वृत्तसंस्थेनुसार, पंतप्रधान शहबाज शरीफ यांनी पोलीस दलाने नेहमीच दहशतवादाविरोधातील लढ्यात आघाडीची भूमिका बजावल्याचे सांगितले. तसेच देशातून दहशतवादाचे प्रत्येक स्वरूप पूर्णपणे नष्ट करण्याचा सरकारचा निर्धार कायम असल्याचे त्यांनी स्पष्ट केले.