Pakistan Airspace: जम्मू-कश्मीरमधील पहलगाम येथील दहशतवादी हल्ल्यानंतर भारत-पाकिस्तानमधील तणाव आणखी वाढला आहे. याचा थेट परिणाम हवाई वाहतुकीवर झाला असून, पाकिस्तानने भारतीय विमानांसाठी आपले हवाई क्षेत्र बंद केले आहे. यामुळे भारताच्या प्रमुख विमान कंपन्यांना, विशेषतः एअर इंडियाला, मोठा आर्थिक फटका बसत आहे. याचा परिणाम भारतातून युरोप, अमेरिका आणि कॅनडाला जाणाऱ्या उड्डाणांवर होत आहे.

एअर इंडियाला 591 दशलक्ष डॉलरचा तोटा –
रॉयटर्सच्या अहवालानुसार, एअर इंडियाने भारत सरकारला पत्र लिहून सांगितले आहे की, पाकिस्तानच्या हवाई क्षेत्र बंदीमुळे त्यांना दरवर्षी सुमारे 591 दशलक्ष डॉलर (अंदाजे 50 अब्ज रुपये) चा तोटा सहन करावा लागू शकतो. एअर इंडियाने सरकारला इंधन खर्च आणि मार्ग बदलामुळे होणाऱ्या नुकसानीची भरपाई करण्यासाठी सबसिडी मॉडेल लागू करण्याची विनंती केली आहे. कंपनीने म्हटले आहे की, परिस्थिती सामान्य होईपर्यंत सरकारने आर्थिक मदत करावी.

कोणत्या देशांचा प्रवास होणार महाग आणि लांबचा?

एअर इंडियाने म्हटले आहे की, त्यांच्याकडे आंतरराष्ट्रीय उड्डाणे आणि कर्मचारी यांची संख्या जास्त असल्याने या बंदीचा सर्वाधिक फटका त्यांनाच बसत आहे. भारतातून युरोप, अमेरिका आणि कॅनडाला जाणारी बहुतांश उड्डाणे एअर इंडियाची असतात, आणि या उड्डाणांचा नेहमीचा मार्ग पाकिस्तानच्या हवाई क्षेत्रातून जातो. आता वैकल्पिक लांब आणि खर्चिक मार्ग वापरावा लागत असल्याने इंधनाचा वापर वाढला आहे, तसेच उड्डाणांचा वेळ आणि खर्चही वाढला आहे.

पाकिस्तानच्या हवाई क्षेत्र बंदीमुळे खालील देशांच्या उड्डाणांवर मोठा परिणाम होत आहे:

ब्रिटन: लंडन, बर्मिंगहॅम, मँचेस्टरसाठी उड्डाणे लांबली आणि महागली.

जर्मनी: फ्रँकफर्ट आणि म्युनिकला जाणारी उड्डाणे वैकल्पिक मार्गाने.

फ्रान्स: पॅरिसला जाणाऱ्या उड्डाणांचा वेळ वाढला.

नेदरलँड्स: अॅमस्टरडॅमसाठी उड्डाणांवर परिणाम.

स्वित्झर्लंड: झ्युरिक आणि जिनिव्हाला जाणाऱ्या उड्डाणांना उशीर.

कॅनडा: टोरंटो आणि व्हँकुव्हरसाठी मार्ग लांबला.

अमेरिका: न्यूयॉर्क, शिकागो, सॅन फ्रान्सिस्को आणि वॉशिंग्टन डीसीसाठी उड्डाणांवर परिणाम.

इटली: रोम आणि मिलानसाठी उड्डाणांचा खर्च वाढला.

ऑस्ट्रिया: व्हिएन्नाला जाणाऱ्या प्रवाशांना जास्त वेळ लागत आहे.

स्पेन: माद्रिद आणि बार्सिलोना उड्डाणांना जास्त इंधन लागत आहे.

एअर इंडियाचा सरकारला प्रस्ताव –

सूत्रांनुसार, नागरिक उड्डयन मंत्रालयाने सर्व विमान कंपन्यांना या बंदीच्या परिणामांचे मूल्यांकन करण्यास सांगितले होते. त्यानुसार, एअर इंडियाने आपले नुकसान आणि सूचना पत्राद्वारे सरकारला सादर केल्या आहेत.

पाकिस्तानी विमान कंपन्यांनाही नुकसान –
पाकिस्तानच्या हवाई क्षेत्र बंदीमुळे केवळ भारतीय विमान कंपन्यांनाच नव्हे, तर प्रवाशांनाही लांब आणि महागड्या उड्डाणांचा सामना करावा लागत आहे. परिस्थितीत सुधारणा न झाल्यास याचा परिणाम भारताच्या आंतरराष्ट्रीय हवाई संपर्क आणि विमानन क्षेत्रावर आणखी गंभीर होऊ शकतो.