Ozar News : नवी दिल्लीच्या पटलावर महाराष्ट्राच्या सहकार क्षेत्राचा मान पुन्हा एकदा उंचावला आहे. हंगाम २०२५-२६ साठी नॅशनल फेडरेशन ऑफ को-ऑप. शुगर फॅक्टरीज लि., नवी दिल्ली यांच्या वतीने (Ozar News) दिला जाणारा देशातील उच्च साखर उतारा विभागातील तांत्रिक कार्यक्षमतेचा अत्यंत प्रतिष्ठित तृतीय क्रमांकाचा राष्ट्रीय पुरस्कार नुकताच दिमाखदार सोहळ्यात प्रदान करण्यात आला.

नवी दिल्ली येथे मंगळवारी (२२ सप्टेंबर) पार पडलेल्या या सोहळ्यात केंद्रीय रस्ते वाहतूक मंत्री नितीन गडकरी यांच्या शुभहस्ते आणि सहकार (Ozar News) राज्यमंत्री कृष्णपाल गुर्जर, नॅशनल फेडरेशनचे अध्यक्ष हर्षवर्धन पाटील व महाराष्ट्र सहकार मंत्री बाबासाहेब पाटील यांच्या प्रमुख उपस्थितीत हा पुरस्कार स्विकारण्यात आला.

श्री विघ्नहर सहकारी साखर कारखान्याचे चेअरमन सत्यशिल शेरकर, व्हाईस चेअरमन अशोक घोलप, कार्यकारी संचालक भास्कर घुले यांच्यासह सर्व संचालक मंडळ आणि अधिकारी वर्गाने अत्यंत उत्साहात हा पुरस्कार स्वीकारला. या ऐतिहासिक क्षणी साखर उद्योगातील अनेक दिग्गज व प्रमुख मान्यवर उपस्थित होते.

पुरस्कारामागील प्रवासाविषयी बोलताना चेअरमन सत्यशिल शेरकर यांनी सांगितले की, कै. वसंतदादा पाटील यांच्या मार्गदर्शनाखाली स्व. निवृत्तीशेठ शेरकर यांनी रोवलेल्या मुहुर्तमेढीचा हा गौरव आहे. संस्थापक स्व. निवृत्तीशेठ शेरकर व स्व. सोपानशेठ शेरकर यांच्या शेतकरी हित जोपासण्याच्या आणि पारदर्शक कारभाराच्या वाटेवरच कारखाना आजही यशस्वी वाटचाल करत आहे.

कारखान्याने कमी कालावधीत पूर्ण केलेले विस्तारीकरण आणि बसविलेली अत्याधुनिक मशिनरी यामुळे वाफेचा प्रभावी वापर होऊन बगॅसची बचत होत आहे, ज्याचा थेट फायदा आसवनी प्रकल्पाला आणि उच्च साखर उतारा मिळण्यासाठी होत आहे. गाळप क्षमता वाढल्यामुळे परिसरातील शेतकऱ्यांचा ऊस आता वेळेत गाळपास जात आहे.

केवळ उत्पादनच नव्हे, तर शेतकरी कल्याणासाठीही विघ्नहर कारखाना नेहमीच अग्रेसर राहिला आहे. वसंतदादा शुगर इन्स्टिट्यूट (VSI) मांजरी बुद्रुक येथील ‘ज्ञानयाग’ व ‘ज्ञानलक्ष्मी’ प्रशिक्षण शिबिरांसाठी पुरुष व महिला शेतकऱ्यांना स्वखर्चाने दरवर्षी पाठविले जाते. तसेच, प्रति एकरी १०० मेट्रिक टन व त्यापुढील ऊस उत्पादन घेणाऱ्या प्रगतशील शेतकऱ्यांना रोख रक्कम, सन्मानचिन्ह व प्रशस्तीपत्र देऊन गौरवले जाते.

व्हीएसआय आणि कारखान्याच्या संयुक्त विद्यमाने गावोगावी (Ozar News) होणाऱ्या शेतकरी मेळाव्यांमुळे कार्यक्षेत्रात उसाच्या उत्पादनात विक्रमी वाढ होत आहे. या सर्वंकष प्रगतीमुळेच विघ्नहरच्या शिरपेचात आज आणखी एक मानाचा तुरा रोवला गेला आहे.