इंदापुरात सृजनशीलतेतून नावीन्यतेची प्रतिकृती
रेडा (प्रतिनिधी) – इंदापूर येथील आय कॉलेजच्या परिसरात महाविद्यालयाने राबवलेल्या अनेक सृजनशील उपक्रमांतर्गत निसर्ग संवर्धनाचा महत्त्वाचा घटक असलेल्या ऑक्‍सिजन पार्कची निर्मिती झाली आहे.

संस्थेचे अध्यक्ष माजी मंत्री हर्षवर्धन पाटील, उपाध्यक्षा पद्मा भोसले, सचिव मुकुंद शहा, विद्यापीठ व्यवस्थापन परिषदेचे सदस्य आणि महाविद्यालयाचे प्राचार्य डॉ. संजय चाकणे यांच्या मार्गदर्शनाखाली अनेक उपक्रम महाविद्यालयात राबविले जातात. ऑक्‍सिजन पार्कमध्ये छोटी, छोटी वने विकसित करण्यात आली आहेत. वड, पिंपळ, उंबर, अर्जुन सादडा, सिसम, पुत्रंजीवी, हत्तीलिंग, बेल, बेहडा, हिरडा, कैलासपती, कडुनिंब, जाई, जुई, मोगरा, सायली, कृष्णकमळ, पारिजातक, रुई, गोकर्ण, सोनचाफा, हिरवा चाफा, पिवळा चाफा, गुलमोहर, निलमोहर, शंखासूर, चिंच, विलायती चिंच, काटेसावर, कण्हेर, चंपा, बॉटलपाम, नारळ, ऑरोकॅरिया आदी वनस्पतींची लागवड केली आहे.

श्री. नारायणदास रामदास पब्लिक चॅरिटेबल ट्रस्टच्या शहा नर्सरीमधून रोपे मोफत उपलब्ध झाली आहेत. विद्यार्थी कल्याण मंडळ, राष्ट्रीय सेवा योजना, राष्ट्रीय छात्र सेना. कर्मचारी यांच्या प्रयत्नाने पार्क पर्यावरणमय झाला आहे. महाविद्यालयामध्ये कार्यक्रमांमध्ये पाहुण्यांचे स्वागत झाडाचे रोपटे देऊन त्यांच्या हस्ते वृक्षारोपण करण्यात येते. पदाधिकारी, शिक्षक, कर्मचारी यांच्या वाढदिवसानिमित्त वृक्षारोपण करून हा वाढदिवस साजरा केला जातो, यातूनच हे पार्क विकसित झाले आहे.