नवी दिल्ली – भारतात जानेवारी महिन्यात करोना विरोधी लस उपलब्ध करून देण्याची तयारी सुरू आहे. सीरम इन्स्टिट्युटने देशांतर्गत विकसित केलेल्या लसीला आपत्कालिन वापरासाठी परवानगी मिळण्यापूर्वी ब्रिटनमध्ये विकसित करण्यात आलेल्या ऑक्‍सफर्ड कोविड-19 लसीला भारतात आपत्कालिन वापरासाठीची परवानगी दिली जाण्याची शक्‍यता आहे.

ब्रिटनमधील औषध नियंत्रकांकडून ऑक्‍सफर्डच्या लसीला मंजूरी दिल्यानंतर केंद्रीय औषध मानक नियंत्रक संस्थेच्या बैठकीमध्ये या लसीची सुरक्षितता आणि प्रतिकारक्षमतेबाबतच्या विदेशात आणि भारतात केलेल्या चाचण्यांच्या अहवालाचा आढावा घेतला जाईल. त्यानंतरच आपत्कालिन वापरासाठीची परवानगी देण्याबाबत निर्णय घेतला जाईल, असे अधिकृत सूत्रांनी सांगितले.

भारत बायोटेकच्या “कोव्हॅक्‍सिन’ लसीच्या तिसऱ्या टप्प्यातील चाचण्या अद्यापही सुरू आहेत. तर फायझरच्या लसीच्या चाचण्यांच्या अहवालांचे अद्याप सादरीकरण होणे बाकी आहे. त्यामुळे या लसींना आपत्कालिन वापरासाठीची परवानगी देण्यासाठी थोडा कालावधी लागू शकतो. त्यामुळे ऑक्‍सफर्डच्या “कोविशील्ड’ लसीला भारतात वापरासाठीची परवानगी दिली जाऊ शकते, असे सूत्रांनी सांगितले. भारतीय औषध महानियंत्रकांनी मागवलेला अतिरिक्‍त डाटा सीरम इन्स्टिट्युटने गेल्याच आठवड्यात सादर केले आहेत.

ब्रिटनमध्ये करोना विषाणूची नवी प्रजाती सापडल्यामुळे भारत आणि अन्य देशांमध्ये विकसित करण्यात येत असलेल्या लसींवर काहीही परिणाम होणार नाही, असे सरकारी अधिकाऱ्यांनी म्हटले आहे.
भारत बायोटेक, सीरम इन्स्टिट्युट आणि फायझर कंपनीने या महिन्याच्या सुरुवातीला भारतीय औषध महानियंत्रकांकडे आपत्कालिन वापरासाठी आपल्या लसीला परवानगी मिळण्यासाठी अर्ज केले आहेत.

केंद्रीय औषध मानक नियंत्रक संस्थेच्या तज्ञांच्या समितीने 9 डिसेंबरच्या बैठकीमध्ये सीरम इन्स्टिट्युट आणि भारत बायोटेकच्या अर्जांचा विचार करताना त्यांच्याकडून सुरक्षितता आणि परिणामकारकतेबाबतचा अतिरिक्‍त डाटा मागवला आहे. तर फायझरच्या लसीबाबतचे सादरीकरण करण्यासाठी कंपनीने अतिरिक्‍त वेळ मागून घेतला असल्याने फायझरच्या भारतातील शाखेने सादर केलेअल्य अर्जाचा मात्र सखोल विचार केला गेला नाही. फायझरच्या लसीला अमेरिका, ब्रिटन आणि बहारीनमध्ये यापूर्वीच मंजूरी दिली गेलेली आहे.

सीरम इन्स्टिट्युटने लस तयार करण्यासाठी ऑक्‍सफोर्ड विद्यापीठ आणि ऍस्ट्रॅजेनेका बरोबर सहकार्य केले आहे. सीरम इन्स्टिट्युटने “डीसीजीआय’ च्या रिस्क मॅन्युफॅक्‍चरिंग आणि साठवण परवान्यांतर्गत आपल्या लसीच्या 4 कोटी डोसचे उत्पादन यापूर्वीच केले आहे.