नवी दिल्ली : 22 एप्रिल 2025 या दिवशी काश्मीरच्या पहलगाम या ठिकाणी दहशतवाद्यांनी हल्ला करुन 26 निरपराध पर्यटकांची त्यांचा धर्म विचारून हत्या केली (Operation Wrath Of God) होती. या हल्ल्यामागे पाकिस्तानचा हात असल्याचे समोर आले. यानंतर भारताने या घटनेचा बदला म्हणून पाकिस्तान विरुद्ध ऑपरेशन सिंदूर राबवत एअर स्ट्राईक आणि सर्जिकल स्ट्राईकद्वारे उत्तर दिले. यामध्ये 100 हून अधिक दहशतवादी मारले आणि त्यांचे दहशतवादी तळ उद्ध्वस्त केले. पाकिस्तानला भारताने चांगलाच धडा शिकवला. यानंतर दोन्ही देशांमध्ये युद्धजन्य परिस्थिती निर्माण झाली होती. 10 मे रोजी दोन्ही देशांनी युद्धविराम केला. या घटनेनंतर सगळ्यांना आठवण झाली ती इस्रायलने राबवलेल्या ‘रॅथ ऑफ गॉड’ मोहिमेची (Operation Wrath Of God) . 1972 मध्ये नक्की काय घडलं? ही मोहीम काय होती? या मोहिमेतून इस्रायलने पॅलेस्टाईनला कशाप्रकारे उत्तर दिले? त्याबद्दल सविस्तर जाणून घेऊया… 1972 मध्ये काय घडलं? ‘रॅथ ऑफ गॉड’ मोहिमेबद्दल जाणून घेण्याअगोदर १९७२ मध्ये त्याबद्दल जाणून घेऊया. 1972 मध्ये म्हणजेच 53 वर्षांपूर्वी जर्मनीने ऑलिम्पिक स्पर्धेचं आयोजन केलं होतं. यातून जर्मनीला हा संदेश द्यायचा होता की आम्ही आता बदललो आहोत. 1936 मध्ये हिटलरने जर्मनीत ऑलिम्पिकची स्पर्धा घेतली होती. त्यानंतर 1972 ला ऑलिम्पिक घेण्यात आलं. ज्याचा विषय निघाला तरीही एक नकोशी आठवण जगाला येते. 5 सप्टेंबर 1972 ला पहाटे चारच्या दरम्यान ‘ब्लॅक सप्टेंबर’ या पॅलेस्टिनी कट्टरपंथी गटाने ऑलिम्पिक व्हिलेजमध्ये प्रवेश केला. म्युनिकच्या ऑलिम्पिक व्हिलेजमध्ये आल्यानंतर या कट्टरपंथीयांनी इस्रायलचे ॲथलिट जिथे थांबले होते तो फ्लॅट गाठला. एका मास्टर की ने तो फ्लॅट उघडला. त्यावेळी पॅलेस्टाईनच्या कट्टरपंथीयांनी दोन ॲथलिट्सना ठार केलं. त्यानंतर इस्रायलच्या नऊ ॲथलिटना काही कोच मंडळींना बांधलं आणि ताब्यात घेतलं. त्यांना ओलीस ठेवून मागणी केली की पॅलेस्टाईनच्या 200 कैद्यांची सुटका करा. या सगळ्यांना इस्रायलच्या तुरुंगात ठेवण्यात आलं होतं. पॅलेस्टाइनचे हे कट्टर पंथीय सगळ्या ओलिसांना घेऊन जर्मनीतल्या एका विमानतळावर गेले. तिथे जर्मनीच्या सुरक्षा दलांनी ओलिसांना सोडवण्यासाठी प्रयत्न केला पण त्यांना यश आले नाही. जर्मनीतल्या सुरक्षा दलांनी हा प्रयत्न केल्याने पॅलेस्टाईनचे कट्टर पंथीय चांगलेच चवताळले आणि त्यांनी एक एक करुन ओलिसांची हत्या करण्यास सुरुवात केली. इस्रायल ऑलिम्पिक समितीच्या नऊ सदस्यांनाही त्यांनी ठार केलं. यानंतर जर्मन सुरक्षा दलांची पॅलेस्टाईन कट्टरतावाद्यांशी मोठी चकमक झाली. यामध्ये 8 पैकी 5 पॅलेस्टाईन कट्टरपंथीय मारले गेले. तर उरलेल्या अदनान अल गाशे, जमाल अल गाशे आणि मोहम्मद सफादी यांना जर्मनीच्या पोलिसांनी ताब्यात घेतलं. पण नंतर त्यांना जर्मनीला सोडावे लागले. कारण पॅलेस्टाईनच्या कट्टर पंथीयांनी जर्मनीच्या लुफ्तांसा एअरलाईन्सचं अपहरण केलं आणि लोकांच्या सुटकेच्या बदल्यात या तिघांची सुटका करुन घेतली. या तिघांना नंतर लिबियाला पाठवलं गेलं होतं. गडाफीने या तिघांना हिरो जाहीर केलं. त्यानंतर ब्लॅक सप्टेंबर या कट्टर पंथीयांच्या समूहात जे सहभागी होते त्यांची हत्या करण्यात आली. या हत्यांचा आरोप इस्रायलच्या गुप्तचर यंत्रणांवर लावण्यात आला. इस्रायलने या हत्यांसाठी जी विशेष मोहीम राबवली गेली त्या मोहिमेचं नाव होतं ‘रॅथ ऑफ गॉड’. नेमकी काय होती ‘रॅथ ऑफ गॉड’ मोहीम? इस्रायलचे त्यावेळचे पंतप्रधान गोल्डा मेयर यांनी त्यांच्या संसदेत दहशतवादाविरोधात आमचं युद्ध होणार अशी घोषणा केली. आमच्या देशातील खेळाडूंची हत्या ज्यांनी केली त्यांना आम्ही सोडणार नाही असंही ते म्हणाले. त्यानंतर हल्ल्यासाठी जे लोक जबाबदार होते त्यांची ओळख पटावी म्हणून एक गुप्त समिती तयार करण्यात आली. त्यानंतर इस्रायलच्या गुप्तचर यंत्रणांपैकी मोसादला या पॅलेस्टाईन कट्टरपंथीय आणि त्यांचे सूत्रधार या सगळ्यांची हत्या करा असे आदेश देण्यात आले. ही मोहीम राबवताना प्रचंड गुप्तता पाळण्यात आली होती. त्यानंतर राबवण्यात आलं ते रॅथ ऑफ गॉड हे गुप्त ऑपरेशन (Operation Wrath Of God) ज्या अंतर्गत ब्लॅक सप्टेंबरच्या सगळ्या दहशतवाद्यांना शोधून त्यांना ठार करण्यात आले. मोसादने या मोहिमेत 12 हून अधिक पॅलेस्टाईनी कट्टरपंथीयांना शोधून ठार केले होते.
