Operation Tiger – शिंदेसेनेचे खासदार नरेश मस्के यांनी ठाकरेसेनेचे खासदार संजय राऊत यांच्यावर टीका केली आहे. ठाकरेसेनेच्या सहा खासदारांनी त्यांना बजावलेला व्हिप नाकारत संजय राऊत यांचे थोबाड फोडले आहे, असा घणाघात मस्के यांनी केला.

मस्के यांनी राऊत यांच्यावर टीका करताना त्यांना काँग्रेसचे दलाल असल्याचे म्हटले. त्यांचा दिवा आता विझत चालला आहे, म्हणूनच ते सध्या जास्त फडफडत आहेत, असा टोलाही त्यांनी लगावला.

मस्के यांनी राऊत यांच्या राजकीय ताकदीवर प्रश्नचिन्ह उपस्थित केले. ते म्हणाले, राऊत यांचा दम फक्त तोंडात आहे, पण ताकद मनगटात असावी लागते.

स्वतः उपमुख्यमंत्री एकनाथ शिंदे यांनी सांगितल्यानंतर आमदारांनी मते दिली, म्हणूनच संजय राऊत हे खासदार होऊ शकले. भविष्यात उद्धव ठाकरे यांचा पक्ष संपूर्णपणे काँग्रेसमध्ये विलिन होणार आहे.

याच भीतीने त्यांच्या खासदारांनी ही बंडखोर भूमिका घेतली आहे. तसेच संजय राऊत यांनी या खासदारांची उद्धव ठाकरे यांच्याशी कधीही थेट भेट होऊ दिली नाही, असा दावाही मस्के यांनी केला.

आता केवळ तीन खासदार शिल्लक राहिले आहेत. ते तरी किती काळ तुमच्या सोबत राहतात, ते आता बघाच, असे म्हस्के यांनी म्हटले आहे.