Operation Lotus : ओडिशामधील राज्यसभा निवडणुकीच्या पार्श्वभूमीवर राजकीय वातावरण तापले असून, कर्नाटकातील एका रिसॉर्टमध्ये मुक्कामाला (Operation Lotus) असलेल्या काँग्रेस आमदारांना कोट्यवधी रुपयांची लाच देऊन फोडण्याचा प्रयत्न उघडकीस आला आहे. ‘ऑपरेशन लोटस‘चा (Operation Lotus) हा कट उधळत दोन संशयितांना अटक करण्यात आली असून, भाजपकडून प्रत्येक आमदाराला ५ कोटी रुपयांची ऑफर देण्यात आल्याचा खळबळजनक आरोप कर्नाटकचे उपमुख्यमंत्री डी. के. शिवकुमार यांनी रविवारी केला. ओडिशात उद्या, १६ मार्च रोजी राज्यसभेसाठी मतदान होणार आहे. या निवडणुकीत घोडेबाजार टाळण्यासाठी काँग्रेसने आपल्या ८ आमदारांना बेंगळुरूजवळील बिदादी येथील एका खाजगी रिसॉर्टमध्ये ठेवले आहे. मात्र, या सुरक्षित ठिकाणीही भाजपने आमदारांशी संपर्क साधण्याचा प्रयत्न केल्याचा दावा काँग्रेसने केला आहे. Operation Lotus शिवकुमार यांनी दिलेल्या माहितीनुसार, चार व्यक्तींनी आमदारांशी संपर्क साधून त्यांना क्रॉस व्होटिंगसाठी रिकामे चेक आणि रोख रकमेचे आमिष दाखवले. यातील सुरेश नावाच्या स्थानिक व्यक्तीने मध्यस्थी केली होती. एका आमदाराने या प्रलोभनाला बळी न पडता पक्षाला माहिती दिल्यानंतर हा सर्व प्रकार समोर आला. याप्रकरणी ओडिशा काँग्रेस विधीमंडळ पक्षाचे उपनेते अशोक कुमार दास यांनी बिदादी पोलीस ठाण्यात अधिकृत तक्रार दाखल केली आहे. विरेंद्र प्रसाद, सुरेश, अजित कुमार साहू आणि सिमाचल मोहकुड अशी आरोपींची नावे असून, लाच नाकारल्यानंतर त्यांनी आमदारांना जीवे मारण्याची आणि ओडिशात पाऊल न ठेवू देण्याची धमकी दिल्याचा आरोपही तक्रारीत करण्यात आला आहे. पोलिसांनी यातील दोन आरोपींना ताब्यात घेतले असून त्यांच्याकडून कोरे चेक जप्त करण्यात आले आहेत. ओडिशात भाजपने अतिरिक्त उमेदवार रिंगणात उतरवल्यामुळे सत्ताधारी बिजू जनता दल आणि काँग्रेसमध्ये धास्ती निर्माण झाली आहे. या राजकीय संघर्षामुळे उद्या होणाऱ्या राज्यसभा निवडणुकीकडे संपूर्ण देशाचे लक्ष लागले आहे.
