आर्टिफिशियल इंटेलिजन्स (AI) क्षेत्रात कार्यरत OpenAI या कंपनीने सॉफ्टबँकसोबत तब्बल 40 अब्ज डॉलरची (सुमारे 3.3 लाख कोटी रुपये) निधी उभारणीची महत्त्वपूर्ण डील केली आहे. या मोठ्या गुंतवणुकीनंतर सॅम ऑल्टमन यांच्या OpenAI चे एकूण मूल्य 300 अब्ज डॉलर (सुमारे 24.7 लाख कोटी रुपये) झाले आहे.

या सोबतच आता ही ओपनएआय जगातील सर्वात मूल्यवान खाजगी कंपन्यांच्या यादीत सामील झाली आहे. सर्वात मूल्यवान खाजगी कंपन्यांमध्ये अब्जाधीश एलॉन मस्क यांची SpaceX कंपनी पहिल्या क्रमांकावर आहे, तर TikTok ची मूळ कंपनी ByteDance दुसऱ्या स्थानावर आहे. या मोठ्या करारानंतर OpenAI ने अनेक मोठ्या कंपन्यांना मागे टाकले आहे.

शेवरॉन (294 अब्ज डॉलर), सेल्सफोर्स (257 अब्ज डॉलर), मॅकडोनाल्ड्स (223 अब्ज डॉलर), पेप्सिको (205 अब्ज डॉलर) आणि सॅमसंग (263 अब्ज डॉलर) या कंपन्यांना ओपनएआयने मागे टाकले आहे.

रिपोर्टनुसार, OpenAI ला मिळालेले हे फंडिंग दोन टप्प्यात दिले जातील. पहिल्या टप्प्यात त्वरित 10 अब्ज डॉलरची (सुमारे 82 हजार कोटी रुपये) तर उर्वरित 30 अब्ज डॉलरची (सुमारे 2.4 लाख कोटी रुपये) रक्कम 2025 च्या अखेरीस कंपनीला मिळेल.

फंडिंगनंतर ओपनएआयने याबाबत माहिती दिली. या गुंतवणुकीमुळे कंपनीला आता AI संशोधनात अधिक प्रगती साधता येईल आणि कंपनीच्या पायाभूत सुविधांना अधिक शक्तिशाली साधनांनी सज्ज करता येईल. OpenAI ची सुरुवात 2015 मध्ये एक नॉन-प्रॉफिट कंपनी म्हणून झाली होती. मात्र, नंतर कंपनीने मर्यादित नफा पद्धतीचा मार्ग स्वीकारला आणि त्याद्वारे फंडिंग जमा करून AI तंत्रज्ञानावर काम करण्यास सुरुवात केली.

आता OpenAI च्याChatGPT चा वापर दर आठवड्याला 50 कोटींहून अधिक यूजर्स करत आहेत. या नवीन गुंतवणुकीनंतर मूल्यांकनाच्या बाबतीत ही कंपनी जगातील तिसरी सर्वात मोठी कंपनी बनली आहे.या मोठ्या फंडिंगमुळे OpenAI आताAI च्या क्षेत्रात आणखी नवीन उंची गाठण्यासाठी सज्ज झाली आहे.