पुणे – सर्वोच्च न्यायालयाने मराठा आरक्षणावर स्थगिती दिल्याने महाराष्ट्र राज्य लोकसेवा आयोगाच्या (एमपीएससी) परीक्षांसाठी “एसईबीसी’ प्रवर्गातून अर्ज भरलेल्या विद्यार्थ्यांना आर्थिकदृष्ट्या दुर्बल घटक (इडब्ल्यूएस) किंवा खुल्या प्रवर्गाचा पर्याय निवडण्याची सूचना आयोगाने केली आहे. त्यासाठी उमेदवारांना 15 जानेवारीपर्यंत मुदत देण्यात आली आहे.

“एमपीएससी’तर्फे 2020 या वर्षासाठी सहायक मोटार वाहन निरीक्षक पूर्व परीक्षा, राज्य सेवा पूर्व परीक्षा, महाराष्ट्र दुय्यम सेवा अराजपत्रित, गट “ब’ संयुक्‍त पूर्व परीक्षा आणि महाराष्ट्र अभियांत्रिकी सेवा पूर्व परीक्षा या चार परीक्षांसाठी विद्यार्थ्यांकडून अर्ज मागवले होते. त्यामध्ये मराठा समाजातील विद्यार्थ्यांनी “एसईबीसी’ प्रवर्गातून अर्ज भरले आहेत.

मात्र, सर्वोच्च न्यायालयाने “एसईबीसी’ आरक्षणावर स्थगिती आणल्याने या परीक्षा अद्याप होऊ शकल्या नाहीत. परीक्षा घेण्यास विलंब होत असल्याने “एमपीएससी’च्या कार्यपद्धतीवर टीका होत आहे. त्यातच आता राज्य शासनाने 23 डिसेंबर 2020 रोजी काढलेल्या शासन निर्णयाप्रमाणे “एसईबीसी’ प्रवर्गातील अर्जामधील प्रवर्ग बदलण्याची सूचना “एमपीएससी’ने केली आहे.

…तर फक्‍त खुल्या गटासाठीच विचार

आयोगाच्या ऑनलाइन अर्ज प्रणालीमध्ये उमेदवारांच्या प्रोफाईलमध्ये जाऊन “एसईबीसी’ आरक्षणासाठी दावा केलेल्यांनी खुला गट किंवा आर्थिकदृष्ट्या दुर्बल घटक (ईडब्ल्यूएस) यापैकी एका आरक्षणाचा पर्याय निवडावा, अशा सूचना देण्यात आल्या आहेत. खुला किंवा “ईडब्ल्यूएस’ आरक्षणाचा पर्याय या मुदतीत न निवडणाऱ्या उमेदवारांचा फक्‍त खुल्या गटासाठीच विचार केला जाईल. “ईडब्ल्यूएस’ आरक्षणाचा लाभ घेतल्यास संबंधित उमेदवार “एसईबीसी’ आरक्षणासाठी पात्र ठरणार नाही. या मुदतीत कोणताही पर्याय न निवडणाऱ्या उमेदवाराच्या बाबतीत दाव्यातील बदलाबाबतची विनंती नंतरच्या टप्प्यावर मान्य केली जाणार नाही.