तळेगाव ढमढेरे : शिरूर तालुक्यातील नागरिकांच्या स्थानिक पातळीवरील समस्या, विकासकामे आणि प्रलंबित प्रश्न थेट जाणून घेऊन त्यावर मार्ग काढण्यासाठी महिन्यातून एक दिवस संपूर्ण तालुक्यासाठी देणार असून, नागरिकांच्या प्रश्नांच्या सोडवणुकीसाठी सातत्याने प्रयत्न करणार, अशी ग्वाही खासदार डॉ. अमोल कोल्हे यांनी दिली. तळेगाव ढमढेरे येथील एल अँड टी रस्त्याच्या कामाच्या भूमिपूजनप्रसंगी ते बोलत होते.

तळेगाव ढमढेरे येथील संत शिरोमणी सावता महाराज मंगल कार्यालयात महिन्यातून एक दिवस जनसंपर्क बैठक घेण्यात येणार असून, या बैठकीत तालुक्यातील नागरिकांच्या प्रश्न, अडचणी आणि विकासकामांबाबतच्या समस्या सोडविणार, असेही त्यांनी यावेळी सांगितले. त्यामुळे तालुक्यातील नागरिकांना आपल्या समस्या थेट खासदारांसमोर मांडण्यासाठी हक्काचे व्यासपीठ उपलब्ध होणार आहे.

तळेगाव ढमढेरे येथील एल अँड टी रस्त्याचे काम सुरू होऊन अचानक बंद पडल्याने नागरिकांमध्ये तीव्र नाराजी निर्माण झाली होती. रस्त्याचे काम तातडीने सुरू करावे, या मागणीसाठी स्थानिक नागरिकांनी आंदोलनाचा मार्ग स्वीकारला होता. यावेळी शिरूर बाजार समितीचे माजी उपसभापती अनिल भुजबळ यांनी खासदार डॉ. कोल्हे यांच्याशी दूरध्वनीद्वारे संपर्क साधून रस्त्याच्या रखडलेल्या कामाची वस्तुस्थिती त्यांच्या निदर्शनास आणून दिली.

नागरिकांची अडचण लक्षात घेऊन डॉ. कोल्हे यांनी दुसऱ्याच दिवशी प्रत्यक्ष तळेगाव ढमढेरे येथे रस्त्याच्या कामाचे भूमिपूजन करून काम सुरू करण्याचे आश्वासन दिले होते. त्यानुसार त्यांनी प्रत्यक्ष भेट देत अधिकारी व कंत्राटदारांशी चर्चा केली. रस्त्याचे काम तातडीने सुरू करण्याच्या स्पष्ट सूचना दिल्या. नागरिकांच्या आंदोलनाची दखल घेऊन काम मार्गी लावल्याने नागरिकांनी समाधान व्यक्त केले.
दरम्यान, शिरूर-हवेलीचे आमदार ॲड. अशोक पवार यांनी मनोगतात खासदार डॉ. अमोल कोल्हे यांच्या माध्यमातून मतदारसंघात झालेल्या विविध विकासकामांची माहिती दिली. रस्ते, पायाभूत सुविधा, नागरिकांच्या विविध प्रश्नांबाबत लोकप्रतिनिधींच्या माध्यमातून सुरू असलेल्या पाठपुराव्याचा आढावा त्यांनी यावेळी घेतला.

यावेळी पुणे जिल्हा बँकेचे माजी उपाध्यक्ष बाळासाहेब नरके, राष्ट्रवादीचे तालुकाध्यक्ष विश्वास ढमढेरे, महिला तालुकाध्यक्षा पूजा भुजबळ, घोडगंगाचे उपाध्यक्ष पोपटराव भुजबळ, शिरूर बाजार समितीचे संचालक सुदीप गुंदेचा, माजी पंचायत समिती सदस्य राजेंद्र भुजबळ, आरपीआयचे अध्यक्ष नवनाथ कांबळे, काँग्रेसचे वैभव यादव, प्रशासक रोहिणी तोडकर, माजी उपसरपंच राकेश भुजबळ, मच्छिंद्र भुजबळ, गोविंद ढमढेरे, खरेदी-विक्री संचालक ज्ञानेश्वर थेऊरकर, संभाजी भुजबळ, शहाजी ढमढेरे, भरत भुजबळ, सुहास भुजबळ, ग्रामविकास अधिकारी चेतन वाव्हळ उपस्थित होते. बाजार समितीचे संचालक अनिल भुजबळ यांनी प्रास्ताविक केले. सूत्रसंचालन ॲड. संपत ढमढेरे यांनी केले. शिरूर कृषी उत्पन्न बाजार समितीचे माजी उपसभापती विश्वास ढमढेरे यांनी आभार मानले.

खासदार कोल्हे अधिकाऱ्यांवर संतापले

यावेळी कार्यक्रमासाठी पीएमआरडीएचे अधिकारी अनुपस्थित राहिल्याने लोकप्रतिनिधींच्या कार्यक्रमाला अधिकारी अनुपस्थित राहणार नसतील तर प्रोटोकॉल नेमका कोणासाठी आहे. अधिकाऱ्यांनी आपली जबाबदारी ओळखली पाहिजे. यापुढे प्रोटोकॉल पाळा, अन्यथा अधिकाराची जाणीव करून द्यावी लागेल,” असा स्पष्ट इशारा डॉ. कोल्हे यांनी दिला. विकासकामांमध्ये प्रशासन, लोकप्रतिनिधी यांच्यात समन्वय असणे गरजेचे आहे. अधिकाऱ्यांच्या निष्काळजीपणामुळे नागरिकांना कामाच्या प्रगतीबाबत माहिती मिळत नाही. त्याचा थेट परिणाम विकासकामांवर होतो, अशी नाराजीही त्यांनी व्यक्त केली.