बंगळूर : बंगळूरमधील मायक्रो ले-आउट पोलिस ठाणे… दुपारी एक वाजता दैनंदिनी प्रमाणे कामकाज सुरु होतं…अचानक  एक महिला ट्रॉली बॅग घेऊन आत आली….सर्वांना सुरुवातील ती महिला तक्रार घेऊन आल्याचे वाटले. पण त्या ट्रॉली बॅगमध्ये महिलेच्या आईचा मृतदेह असल्याचे समजताच सर्वांना धक्का बसला. संबंधित महिलेने जन्मदात्या आईची काही तासांपूर्वीच आपण हत्या केल्याचे पोलिसांना सांगितले.

दरम्यान, मृत महिलेचे नाव बिवा पॉल असे आहे. ती कोडिचिकनहळ्ळी येथील एनएसआर ग्रीन्स अपार्टमेंटमध्ये राहत होती. सोनाली सेन हिने फिजिओथेरपिस्टची नुकतीच नोकरी सोडली आहे. पोलिस सूत्रांनी दिलेल्या माहितीनुसार, सोनाली सेन ही तिचा पती आणि सासूसोबत राहते. पतीच्या निधनानंतर बिवा पॉल ही तिच्या मुलीच्या सोनाली सेनच्या घरी राहायला आली.

मात्र, सोनालीच्या सासूशी तिचे नेहमी भांडण होत असे. रविवारी भांडणानंतर पॉलने सांगितले की, ती जिवंत असेपर्यंत शांतता नांदणार नाही. त्यानंतर सासूने सोनालीला तिला मारण्यास सांगितले. सोमवारी सकाळी ७.१५ च्या सुमारास तिचे पती कामावर गेल्यानंतर सोनालीने तिच्या आईला रक्तदाब नियंत्रित करण्यासाठी वापरल्या जाणाऱ्या सुमारे ३० गोळ्या खाऊ घातल्या.

सकाळी ११.३० च्या सुमारास पॉलला पक्षघाताचा झटका आला आणि ती ओरडू लागली. त्यानंतर सोनालीने तिच्या आईचा गळा आवळून खून केला. आणि तिचा मृतदेह ट्रॉली बॅगमध्ये ठेवला, असे तिने पोलिसांना दिलेल्या कबुली जबाबात म्हटले आहे. दरम्यान, या घटनेने एकच खळबळ उडाली आहे.