Anjali Jathar : शाहरुखसोबत अॅानस्क्रीन रोमान्स; 28 वर्षापूर्वी बॅालिवूडला ठोकला रामराम, आता ही अभिनेत्री काय करते?
Anjali Jathar : मात्र, गेल्या जवळपास २८ वर्षांपासून अभिनयविश्वापासून अंजली दूर आहे. सध्या ही अभिनेत्री कुठे आहे आणि काय करते, याची उत्सुकता चाहत्यांना कायम असते.
Anjali Jathar : बॉलिवूडमध्ये अनेक कलाकारांनी आपल्या अभिनयाच्या जोरावर एक काळ गाजवला. मात्र, बदलत्या काळासोबत आणि विविध कारणांमुळे त्यांपैकी काही कलाकार रुपेरी पडद्यापासून दूर गेले. अशीच एक कलाकार म्हणजे अंजली जठार.
१९९५ मध्ये प्रदर्शित झालेल्या ‘त्रिमूर्ती’ चित्रपटात अंजली शाहरुखसोबत अॅानस्क्रिन दिसली होती. या दोघांची रोमँटिक केमिस्ट्री चाहत्यांच्या पसंतीस उतरली होती. मात्र, गेल्या जवळपास २८ वर्षांपासून अभिनयविश्वापासून अंजली दूर आहे. सध्या ही अभिनेत्री कुठे आहे आणि काय करते, याची उत्सुकता चाहत्यांना कायम असते.
दिग्दर्शक सुभाष घई यांच्या ‘त्रिमूर्ती’ चित्रपटात शाहरुख खान, जॅकी श्रॉफ आणि अनिल कपूर यांच्यासोबत अभिनेत्री अंजली जठारच्या अभिनयाचे देखील कौतुक प्रेक्षकांनी केले. मात्र, प्रसिद्धीच्या झोतात असतानाच अभिनेत्रीने अचानक मोठा निर्णय घेत बॅालिवूडला रामराम ठोकला. तिच्या या निर्णयामुळे त्यावेळी तिच्या चाहत्यांना मोठा धक्का बसला होता.
एकेकाळी ही अभिनेत्री हिंदी चित्रपटसृष्टीतील देखण्या अभिनेत्रींपैकी एक मानली जायची. अभिनय सोडल्यानंतर तिने नृत्य क्षेत्रात स्वतःची नवी ओळख निर्माण केली आहे. सध्या अंजली जठार अमेरिकेतील नॉर्थ कॅरोलिना येथे वास्तव्यास आहे. तिथे ‘अंजली जठार बॉलीवूड डान्स अकादमी’ नावाची नृत्यसंस्था ती चालवते. या अकादमीत मुलांना बॉलिवूड शैलीतील नृत्याचे प्रशिक्षण दिले जाते. या अकादमीचे उपक्रम आणि अपडेट्स सोशल मीडियाच्या माध्यमातून चाहत्यांसोबत ती सतत शेअर करत असते.
अंजली जठार हिने १९९४ मध्ये प्रदर्शित झालेल्या ‘मदहोश’ या चित्रपटातून बॉलिवूडमध्ये पदार्पण केले. त्यानंतर ‘गुंडाराज’, ‘ढाल’, ‘विश्वास’ आणि ‘शस्त्र’ यांसारख्या चित्रपटांमध्ये अभिनेत्रीने काम केले. तसेच अजय देवगण, सुनील शेट्टी यांसारख्या आघाडीच्या कलाकारांसोबत ती झळकली.
अंजली जठार शेवटची १९९८ मध्ये प्रदर्शित झालेल्या ‘खोटे सिक्के’ या चित्रपटात दिसली होती. त्यानंतर तिने अभिनयाला पूर्णविराम देत परदेशात स्थायिक होण्याचा मोठा निर्णय घेतला. त्यावेळी अभिनेता अर्शद वारसी याच्यासोबत साखरपुडा झाल्याच्या चर्चाही रंगल्या होत्या. मात्र, या चर्चा विवाहापर्यंत पोहोचल्या नाहीत. त्यानंतर अंजलीने चित्रपटसृष्टीपासून दूर राहून नृत्य प्रशिक्षणाच्या माध्यमातून नवी वाट निवडली.
हेही वाचा : Crime News : खोट्या तक्रारींची धमकी देत 70 लाखांच्या खंडणीचा प्रयत्न; शिरूर पोलिसांत गुन्हा दाखल
