नवी दिल्ली : आयकर विभागाने हैदराबादमध्ये एका औषध निर्माण म्हणजेच फार्मास्युटिकल कंपनीवर छापा टाकला आहे. या छाप्यात तब्बल ५५० कोटी रुपयांची बेहिशोबी मालमत्ता आढळून आली आहे. धक्कादायक बाब म्हणजे या छाप्यामध्ये एका कपाटात ५०० च्या नोटा आढळून आल्या असून ही रक्कम १४२ कोटी ८७ लाख इतकी असल्याची माहिती समोर येत आहे. सध्या या छाप्यादरम्यान सापडलेल्या या रोख रक्कमेचे फोटो सोशल नेटवर्किंगवर व्हायरल झाले आहेत. आयकर विभागाने जारी केलेल्या अधिकृत पत्रकानुसार ज्या कंपनीवर छापा टाकण्यात आला ती कंपनी परदेशात औषधे पाठवणारी कंपनी आहे. अमेरिका, युरोप, दुबई आणि आफ्रीकन देशांमध्ये या कंपनीने निर्माण केलेली औषधांची निर्यात केली जाते. छापेमारीदरम्यान आयकर विभागाच्या अधिकाऱ्यांनी एक कपाट उघडलं आणि त्यांना समोरचं दृष्य पाहून धक्काच बसला. एका मोठ्या कपाटामध्ये ५०० च्या नोटांचे अनेक गड्ड्या ठेवण्यात आल्याचे त्यांना दिसून आले. छापा टाकण्यात आलेली कंपनी ही हेटेरो फार्मास्युटिकल समुहामधील कंपनी असल्याचे सांगण्यात येत आहे. आयकर विभागाने बुधवारपासून राज्यामधील ५० वेगवेगळ्या ठिकाणीनी छापेमारी केली आहे. या छाप्यांमध्ये आयकर विभागाला खात्यांची माहिती असणारी पुस्तकं, डिजिटल उपकरणे, पेन ड्राइव्ह आणि बरीच कागदपत्रं हाती लागली आहेत. अनेक बनावट तसेच अस्तित्वात नसलेल्या कंपन्यांकडून खरेदी करण्यात आल्याचं दाखवण्यात आले होते. हा काळापैसा लपवण्यासाठी व्यवहार झाल्याचे कागदोपत्री दाखवण्यात आलेले तसेच जमीन खरेदीचा व्यवहार झाल्याचेही पुरावे या छापेमारीमध्ये सापडले आहेत. तपासादरम्यान कंपनीच्या नावे अनेक बँक लॉकर्स असल्याचे समोर आले असून १६ लॉकर्स नियमीतपणे वापरले जात आहे. या छापेमारीमध्ये पैसे भरुन ठेवलेले एक संपूर्ण कपाट पाहून अनेकांना आश्चर्याचा धक्का बसला असून सोशल नेटवर्किंगवर या कपाटाचे फोटो व्हायरल झालेत. आयकर विभागाने या कंपनीचे नावं सांगितलं नसलं तरी हेटेरो फार्मास्युटिकल समुहामध्ये ही कंपनी असून याच समुहाने करोनाच्या उपचारावरील रेमडिसीवीरचे जेनरिक व्हर्जन बाजारात आणले होते.
