NZ Cricket : न्यूझीलंडच्या ‘या’ खेळाडूवर एका महिन्याची बंदी, कोकेनचे सेवन करणं पडलं महागात….
Doug Bracewell Tests Positive for Cocaine : न्यूझीलंडचा माजी वेगवान गोलंदाज डग ब्रेसवेलवर एका महिन्याची बंदी घालण्यात आली आहे. कोकेन सेवन केल्याप्रकरणी चाचणीत तो पॉझिटिव्ह आढळला आहे. खरं तर, या वर्षी जानेवारीमध्ये, ब्रेसवेलने देशांतर्गत टी-20 सामन्यात सेंट्रल डिस्ट्रिक्ट्सकडून खेळताना वेलिंग्टनविरुद्ध चमकदार कामगिरी केली होती. त्या सामन्यानंतर ब्रेसवेलने ड्रग्ज सेवन केले होते. याबाबत, स्पोर्ट्स इंटिग्रिटी कमिशनने पुष्टी केली आहे की, “या 34 वर्षीय वेगवान गोलंदाजाने खरोखरच कोकेनचे सेवन केले होते.”
Former Black Caps bowler Doug Bracewell has been handed a one-month ban from cricket, having been found to have used cocaine. https://t.co/R9jSBhOWyw
— The ACC (@TheACCnz) November 18, 2024
स्पोर्ट्स इंटिग्रिटी कमिशनला त्यांच्या तपासणीत असे आढळून आले की, डग ब्रेसवेलने कोकेनचे सेवन केले होते, परंतु त्याचा त्याच्या क्रिकेट कामगिरीशी काहीही संबंध नव्हता. वेलिंग्टनविरुद्धच्या त्या सामन्यात ब्रेसवेलने 21 धावांत 2 बळी घेतले होते आणि 11 चेंडूत 30 धावांची तुफानी खेळी खेळून आपल्या संघाच्या 6 गडी राखून विजयात महत्त्वपूर्ण योगदान दिले होते. दोषी आढळल्यानंतर, ब्रेसवेलवर सुरुवातीला तीन महिन्यांची बंदी घालण्यात आली होती, जी नंतर एक महिन्यावर कमी करण्यात आली कारण त्याने सुधारक केंद्रात एक महिना घालवला होता.
ब्रेसवेलकडून चूक मान्य…
न्यूझीलंड क्रिकेटच्या मुख्य कार्यकारी अधिकाऱ्यांनी डग ब्रेसवेलच्या कृतीबद्दल निराशा व्यक्त केली आहे, पण तरीही बोर्डानं त्याच्या क्रिकेट कारकिर्दीला पाठिंबा देण्यास सहमती दर्शवली आहे. ब्रेसवेलने आपली चूक मान्य केली आहे. त्याच्याबदल सांगायचे झाले तर डग ब्रेसवेलची कारकीर्द मैदानाबाहेर वादग्रस्त घटनांनी भरलेली आहे. वयाच्या 18व्या वर्षापासून त्याला अशा घटनांनी घेरले आहे. दारूच्या नशेत गाडी चालवताना त्याला अनेकवेळा पकडण्यात आले आहे. 2010 ते 2017 पर्यंत अशा घटनांमुळे तो अनेकवेळा चर्चेत आला होता.
ब्रेसवेलची आंतरराष्ट्रीय कारकिर्द….
डग ब्रेसवेलने आपल्या आंतरराष्ट्रीय कारकिर्दीत न्यूझीलंडकडून 28 कसोटी सामन्यांमध्ये 74 बळी घेण्यासोबतच 568 धावा केल्या. त्याच्या नावावर 21 एकदिवसीय सामन्यांमध्ये 26 विकेट आणि 221 धावा आहेत आणि एकदिवसीय क्रिकेटमध्ये त्याने अर्धशतकही ठोकले आहे. त्याने 20 टी-20 सामन्यात 20 बळीही घेतले आहेत.
