Nuwan Thushara Court Case SLC IPL 2026 : आयपीएल २०२६ चा हंगाम मोठ्या उत्साहात सुरू झाला असला, तरी गतविजेत्या आरसीबी संघाच्या अडचणीत वाढ झाली आहे. संघाचा श्रीलंकन वेगवान गोलंदाज नुवान तुषाराने आयपीएलमध्ये खेळण्यासाठी थेट श्रीलंकन क्रिकेट बोर्डाविरुद्ध (SLC) न्यायालयात धाव घेतल्याने क्रिकेट वर्तुळात एकच खळबळ उडाली आहे. आयपीएलच्या १९ व्या हंगामात सहभागी होण्यासाठी श्रीलंकेचा वेगवान गोलंदाज नुवान तुषाराने टोकाचे पाऊल उचलले आहे. श्रीलंकन क्रिकेट बोर्डाने (SLC) त्याला आयपीएल २०२६ साठी ‘अनापत्ती प्रमाणपत्र’ (NOC) देण्यास नकार दिल्याने, त्याने कोलंबो जिल्हा न्यायालयात धाव घेतली आहे. बोर्डाने त्याला एनओसी देण्यासाठी ‘फिटनेस टेस्ट’ची अट घातली होती, ज्यामध्ये तो अपयशी ठरला आहे. नेमकं प्रकरण काय? श्रीलंकन बोर्डाच्या नियमानुसार, कोणत्याही खेळाडूला विदेशी लीगमध्ये खेळण्यासाठी फिटनेस चाचणी उत्तीर्ण होणे अनिवार्य आहे. मात्र, तुषाराने न्यायालयात अशी युक्तिवाद केला आहे की, श्रीलंका क्रिकेटसोबतचा त्याचा करार ३१ मार्च रोजी संपला असून त्याला तो पुढे वाढवायचा नाही. त्याने बोर्डाला आधीच कळवले आहे की, त्याला आंतरराष्ट्रीय क्रिकेटमधून निवृत्ती घ्यायची आहे. तरीही बोर्डाने त्याला अडवून धरल्याने त्याने कायदेशीर मार्ग निवडला आहे. हेही वाचा – LSG vs DC : केएल राहुलसारखीच पंतची अवस्था, पराभवानंतर संजीव गोयंका संतापले? मैदानातच कर्णधार-प्रशिक्षकाचा घेतली शाळा फिटनेसचा पेच आणि कोर्टाची तारीख नुवान तुषाराच्या मते, त्याच्या फिटनेसची पातळी कधीही कमी नव्हती आणि यापूर्वी याच फिटनेससह बोर्डाने त्याला खेळण्याची परवानगी दिली होती. श्रीलंकन बोर्डाने मात्र आपल्या भूमिकेवर ठाम राहून तुषाराला एनओसी नाकारली आहे. आता या प्रकरणाची सुनावणी ९ एप्रिल रोजी होणार आहे. तोपर्यंत तुषारा आरसीबीच्या ताफ्यात सामील होऊ शकणार नाही, हा आरसीबीसाठी मोठा धक्का मानला जात आहे. २०२२ पासून श्रीलंकेसाठी ३० टी-२० सामने खेळलेला हा गोलंदाज आता आरसीबीच्या जर्सीत दिसणार की नाही, याचा फैसला कोर्टाच्या निर्णयानंतरच होईल.
