NSE IPO : नॅशनल स्टॉक एक्स्चेंजच्या (NSE) बहुप्रतीक्षित आयपीओमध्ये मोठा बदल झाला आहे. जूनमध्ये सेबीकडे सादर केलेल्या मसुद्याच्या तुलनेत आयपीओचा आकार सुमारे 15 टक्क्यांनी कमी करण्यात आला आहे. आता विक्रीसाठी 14.9 कोटी ऐवजी 12.64 कोटी शेअर्स उपलब्ध असतील. NSE चा आयपीओ पूर्णपणे ऑफर फॉर सेल (OFS) स्वरूपाचा आहे.

₹22,569 कोटींचा आयपीओ

NSE ने प्रति शेअर ₹1,700 ते ₹1,785 असा किंमत पट्टा निश्चित केला आहे. कमाल किंमत गृहीत धरल्यास आयपीओचा आकार सुमारे ₹22,569 कोटी होईल. यापूर्वी आयपीओचा आकार सुमारे ₹30,000 कोटी असण्याचा अंदाज होता. हा आयपीओ आला तर तो देशातील दुसऱ्या क्रमांकाचा मोठा आयपीओ ठरेल. 2024 मध्ये आलेला ह्युंदाई मोटर इंडिया चा ₹27,870 कोटींचा आयपीओ सध्या सर्वात मोठा आहे.

NSE चे मूल्यांकनही कमी

आयपीओच्या आकारासोबत NSE चे अंदाजित मूल्यांकनही कमी झाले आहे. आधी सुमारे ₹5 लाख कोटी मूल्यांकनाचा अंदाज होता. आता ते सुमारे ₹4.2 लाख कोटी मानले जात आहे. शेअरची आधीची अंदाजित किंमत ₹2,000-2,100 होती. ती आता ₹1,700-1,785 करण्यात आली आहे.

SBIसह अनेक गुंतवणूकदारांची विक्री कमी

SBIने विक्रीसाठी ठेवलेले शेअर्स 2.47 कोटींवरून 1.6 कोटी केले आहेत. MS Strategic (Mauritius) 1.6 कोटींऐवजी 1.1 कोटी शेअर्स विकणार आहे. बँक ऑफ बडोदा, स्टॉक होल्डिंग कॉर्पोरेशन ऑफ इंडिया, जीआयसी आणि नॅशनल इन्शुरन्स कंपनी यांनीही विक्रीचे प्रमाण कमी केले आहे.

दरम्यान, कॅनडा पेन्शन प्लॅन इन्व्हेस्टमेंट बोर्ड, अरंडा इन्व्हेस्टमेंट्स, न्यू इंडिया अॅश्युरन्स आणि युनायटेड इंडिया इन्शुरन्स यांनी प्रस्तावित विक्री कायम ठेवली आहे.

17 सप्टेंबरला उघडणार

NSE IPO 17 सप्टेंबरला खुला होऊन 21 सप्टेंबरला बंद होईल. अँकर गुंतवणूकदारांसाठी बोली 16 सप्टेंबरला असेल. शेअर्सची 24 सप्टेंबरला सूचीबद्धता होण्याची शक्यता आहे.