Bank strike : देशभरातील बँक कर्मचारी आणि अधिकाऱ्यांच्या संघटनांनी ११ सप्टेंबर २०२६ रोजी एक दिवसाच्या देशव्यापी संपाची घोषणा केली आहे. बँक संघटनांच्या विविध मागण्यांवर सरकारसोबत चर्चा झाली; मात्र त्यावर अद्याप तोडगा निघालेला नाही. त्यामुळे या संपाचा परिणाम बँकांच्या कामकाजावर होण्याची शक्यता आहे.

युनायटेड फोरम ऑफ बँक युनियन्सने हा संप पुकारला आहे. बँकिंग क्षेत्रात आठवड्यातून पाच दिवस कामकाज सुरू करावे, कामगिरीशी संबंधित प्रोत्साहन योजनेबाबतचे मतभेद दूर करावेत आणि पेन्शनशी संबंधित प्रलंबित प्रश्न सोडवावेत, या प्रमुख मागण्या संघटनांनी केल्या आहेत.

सलग चार दिवस बँकिंग सेवांवर परिणाम?

११ सप्टेंबरला शुक्रवार आहे. त्यानंतर १२ सप्टेंबरला दुसरा शनिवार आणि १३ सप्टेंबरला रविवार असल्याने बँका बंद राहतील. याशिवाय १४ सप्टेंबरला गणेश चतुर्थीनिमित्त काही राज्यांमध्ये बँकांना सुट्टी आहे. त्यामुळे काही भागांत बँकिंग सेवा सलग चार दिवस प्रभावित होण्याची शक्यता आहे.

PNBसह अनेक बँकांचा इशारा –

पंजाब नॅशनल बँक, इंडियन बँक, बँक ऑफ महाराष्ट्र, यूको बँक, स्टेट बँक ऑफ इंडिया आणि युनियन बँक ऑफ इंडिया यांसह अनेक सरकारी बँकांनी संपाबाबत सूचना जारी केली आहे.

बँकांनी ग्राहकांची गैरसोय कमी करण्यासाठी आवश्यक व्यवस्था केल्याचे सांगितले आहे. मात्र कर्मचारी संपात सहभागी झाल्यास शाखा आणि कार्यालयांमधील कामकाजावर परिणाम होऊ शकतो, असा इशाराही बँकांनी दिला आहे.

पुढे आणखी मोठा संप?

बँक संघटनांनी २८ ते ३० सप्टेंबरदरम्यान तीन दिवसांचा संप करण्याचीही घोषणा केली आहे. मागण्यांवर तोडगा निघाला नाही, तर २६ ऑक्टोबरपासून बेमुदत संप सुरू करण्याचा इशारा संघटनांनी दिला आहे.

त्यामुळे सप्टेंबर आणि ऑक्टोबरमध्ये बँकिंग सेवांवर परिणाम होण्याची शक्यता असून, ग्राहकांनी महत्त्वाची बँकिंग कामे आधीच करून ठेवण्याचा विचार करणे योग्य ठरू शकते.