Tukaram Mundhe : श्री क्षेत्र शनिशिंगणापूर हे देशभरातील लाखो भाविकांचे श्रद्धास्थान असून, शनि चौथऱ्यावर शनिदेवाला तेल अर्पण करण्याची परंपरा असल्याने मंदिर परिसरात तेलाची मोठ्या प्रमाणावर विक्री होते. मात्र, याच तेलाच्या गुणवत्तेवर आता गंभीर प्रश्नचिन्ह उपस्थित झाले आहे.

शनिमूर्तीवर वाहण्यासाठी विकल्या जाणाऱ्या तेलात भेसळ होत असल्याचा संशय व्यक्त करण्यात आला असून, या संपूर्ण प्रकाराची तातडीने चौकशी करण्यात यावी, अशी मागणी करण्यात आली आहे. त्यामुळे भाविकांच्या श्रद्धेशी जोडलेल्या या तेलाच्या विक्रीत नेमकं काय सुरू आहे, याचा तपास होणार का, असा सवाल उपस्थित होत आहे.

राष्ट्रीय श्रीराम संघाच्या वतीने यासंदर्भात शनिशिंगणापूर देवस्थान ट्रस्टकडे निवेदन देण्यात आले आहे. या प्रकरणात मोठे रॅकेट असण्याची शक्यता असल्याचा दावा संघटनेने केला आहे. भाविकांच्या श्रद्धेचा गैरफायदा घेत निकृष्ट, बनावट अथवा भेसळयुक्त तेलाची विक्री केली जात असेल, तर अशा विक्रेत्यांची चौकशी करून दोषींवर कठोर कारवाई करावी, अशी मागणी निवेदनातून करण्यात आली आहे.

‘मुंढेंच्या FDA’कडून तपासणीची मागणी

या प्रकरणाची गंभीर दखल घेत अन्न व औषध प्रशासनाने शनिशिंगणापूर मंदिर परिसरात विशेष तपासणी मोहीम राबवावी, अशी मागणी करण्यात आली आहे. FDA आयुक्त तुकाराम मुंढे यांनी स्वतः या तक्रारीची दखल घेऊन संबंधित तेलाचे नमुने प्रत्यक्ष ताब्यात घ्यावेत आणि प्रयोगशाळेत त्यांची गुणवत्ता तपासावी, अशी मागणी करण्यात आली आहे.

तेलाच्या नमुन्यांमध्ये नेमके कोणते घटक आहेत, ते निर्धारित दर्जाचे आहे का, त्यामध्ये कोणत्याही प्रकारची भेसळ किंवा चुकीची मिसळ करण्यात आली आहे का, याची शास्त्रीय तपासणी झाल्यानंतरच या आरोपांमागील सत्य समोर येऊ शकते.

विशेष म्हणजे, शनिशिंगणापूर मंदिर परिसरात विक्री होणाऱ्या तेलाच्या गुणवत्तेची तपासणी करण्यासाठी यापूर्वीही देवस्थानकडून अन्न व औषध प्रशासनाला आवाहन करण्यात आल्याचे समोर आले आहे. त्यामुळे आता FDA प्रत्यक्षात नमुने घेऊन तपासणी करणार का, याकडे भाविकांचे लक्ष लागले आहे.

भाविकांच्या श्रद्धेचा गैरफायदा घेणाऱ्यांवर कारवाईची मागणी

शनिदेवाला तेल अर्पण करण्यासाठी देशभरातून भाविक शनिशिंगणापूरला येतात. श्रद्धेने खरेदी केलेल्या तेलाचा दर्जा निकृष्ट असेल किंवा त्यामध्ये भेसळ केली जात असेल, तर हा केवळ खाद्यपदार्थांच्या गुणवत्तेचा प्रश्न राहत नाही, तर भाविकांच्या श्रद्धेचा आणि विश्वासाचा गैरफायदा घेण्याचा गंभीर प्रकार ठरू शकतो.