Nitish Kumar – बिहारचे मुख्यमंत्री नितीश कुमार यांच्या संयुक्त जनता दल पक्षाच्या राष्ट्रीय कार्यकारिणीची येत्या २९ जून रोजी राजधानी दिल्लीत बैठक होणार आहे.

त्यांच्या पक्षाचे सगळ्या राज्यांचे प्रदेशाध्यक्ष, केंद्रीय मंत्री आणि सर्व खासदार बैठकीला उपस्थित राहणार असून या बैठकीत नितीश काय करतात याकडे सगळ्यांचे लक्ष लागले आहे.

नुकत्याच झालेल्या लोकसभा निवडणुकीत पक्षाला मिळालेल्या यशाबद्दल अगोदर धन्यवाद प्रस्ताव मांडला जाणार असून नितीश यांच अध्यक्ष म्हणून भाषणही होणार आहे. केंद्र सरकारमध्ये जनता दलाच्या सहभागाबाबतही बैठकीत चर्चा केली जाणार आहे.

निवडणुकीत पक्षाला मिळालेली मते आणि ज्या जागांवर पराभव झाला आहे तेथील स्थितीबात मंथन केले जाणार असल्याचे सूत्रांकडून सांगण्यात आले.

देशाच्या दृष्टीने महत्वाच्या असलेल्या प्रश्‍नांवर एनडीएमध्ये जनता दलाची काय भूमिका असेल याचाही आढावा आणि चर्चा केली जाणार आहे. तसेच संयुक्त जनता दलाच्या विस्ताराबाबत चर्चा केली जाईल.