Nishikant Dubey : भारतीय जनता पक्षाचे खासदार निशिकांत दुबे (Nishikant Dubey) यांनी गुरुवारी काँग्रेस नेते आणि लोकसभेतील विरोधी पक्षनेते राहुल गांधी यांच्याविरोधात आक्रमक पवित्रा घेतला आहे. राहुल गांधी यांचे लोकसभा सदस्यत्व रद्द करण्यात यावे आणि त्यांना आयुष्यभरासाठी निवडणूक लढवण्यास बंदी घालण्यात यावी, अशी मागणी करत दुबे (Nishikant Dubey) यांनी संसदेत एक ‘स्वतंत्र प्रस्ताव’ सादर करण्यासाठी नोटीस दिली आहे. संसद भवनाच्या परिसरात प्रसारमाध्यमांशी संवाद साधताना निशिकांत दुबे यांनी राहुल गांधींवर गंभीर आरोप केले. त्यांनी स्पष्ट केले की, ही केवळ हक्कभंगाची नोटीस नसून तो एक स्वतंत्र प्रस्ताव आहे. राहुल गांधी परदेश दौऱ्यावर असताना सोरोस फाउंडेशन, यूएसएआयडी आणि फोर्ड फाउंडेशन यांसारख्या संस्थांच्या संपर्कात असतात आणि भारतविरोधी शक्तींशी हातमिळवणी करतात, असा दावा दुबे यांनी आपल्या नोटीसमध्ये केला आहे. गांधींचे थायलंड, व्हिएतनाम आणि कंबोडिया यांसारख्या देशांतील दौरे संशयास्पद असून ते देशाच्या हितासाठी घातक असल्याचेही त्यांनी नमूद केले. Nishikant Dubey काय आहे स्वातंत्र्य प्रस्ताव? लोकसभेच्या कामकाजात ‘स्वतंत्र प्रस्ताव’ हा असा एक प्रस्ताव असतो जो एखाद्या महत्त्वाच्या विषयावर सभागृहाचे मत किंवा निर्णय घेण्यासाठी मांडला जातो. दुबे यांनी राहुल गांधींवर लावलेले देशविरोधी शक्तींशी संगनमताचे आरोप अत्यंत गंभीर स्वरूपाचे असून, आता या प्रस्तावावर लोकसभा अध्यक्ष काय भूमिका घेतात, याकडे संपूर्ण देशाचे लक्ष लागले आहे. दरम्यान, या मागणीमुळे सत्ताधारी भाजप आणि विरोधी पक्ष काँग्रेस यांच्यातील संघर्ष अधिक तीव्र होण्याची चिन्हे दिसत आहेत.
