Nirmala Sitharaman: केंद्रीय अर्थमंत्री निर्मला सीतारमण यांच्या आंध्र प्रदेशातील एका कार्यक्रमाचा व्हिडीओ सध्या चर्चेत आहे. 2 ऑक्टोबर रोजी अन्नमय्या जिल्ह्यातील मदनपल्ले याठिकाणी आयोजित कार्यक्रमात सीतारमण भाषणासाठी उभ्या राहिल्यानंतर गर्दीतून मोठ्या आवाजात घोषणाबाजी सुरू झाली. त्यामुळे त्यांना काही काळ आपलं भाषण थांबवावं लागलं.

मदनपल्ले याठिकाणी 1 लाख कोटी रुपयांच्या ग्लोबल हॉर्टिकल्चर हब प्रकल्पाचा शुभारंभ आणि इंडियन स्कूल ऑफ अॅग्रीकल्चरच्या पायाभरणीचा कार्यक्रम आयोजित करण्यात आला होता. यावेळी आंध्र प्रदेशचे मुख्यमंत्री एन. चंद्राबाबू नायडू, उपमुख्यमंत्री पवन कल्याण आणि रिलायन्स इंडस्ट्रीजचे कार्यकारी संचालक अनंत अंबानी यांच्यासह अनेक मान्यवर उपस्थित होते.

सीतारमण भाषणासाठी पोडियमवर येताच गर्दीतून घोषणाबाजी सुरू झाली. काही जण स्थानिक तरुणांसाठी रोजगाराच्या संधी उपलब्ध करून देण्याची मागणी करत असल्याचे सांगितले जात आहे. परिस्थिती पाहून सीतारमण यांनी उपस्थितांना शांत राहण्याचं आणि आपलं म्हणणं ऐकून घेण्याचं आवाहन केलं. मात्र घोषणाबाजी काही काळ सुरूच राहिल्याने मुख्यमंत्री चंद्राबाबू नायडू यांनी माईक हाती घेतला आणि उपस्थितांना शांत राहण्याची विनंती केली. त्यानंतर परिस्थिती नियंत्रणात आली आणि सीतारमण यांनी भाषण पुढे सुरू केलं.

या घटनेचा व्हिडीओ सोशल मीडियावर व्हायरल झाल्यानंतर राजकीय आरोप-प्रत्यारोपांना सुरुवात झाली. काँग्रेसचे राज्यसभा खासदार जयराम रमेश यांनी या घटनेवर भाष्य करत सरकारविरोधात जनतेमध्ये नाराजी असल्याचा दावा केला. नायडूंना स्वतः माईक हाती घेऊन उपस्थितांना शांत करावं लागल्याचंही त्यांनी म्हटलं.

मात्र चंद्राबाबू नायडूंनी जयराम रमेश यांच्या दाव्याला सोशल मीडिया प्लॅटफॉर्म ‘एक्स’वरून उत्तर दिलं. कार्यक्रमात झालेली घोषणाबाजी ही सरकारविरोधातील नाराजी नसून उपस्थितांचा उत्स्फूर्त प्रतिसाद आणि उत्साह असल्याचं नायडूंनी स्पष्ट केलं.

“जयराम जी, जे घडलं त्याबद्दल तुमची समज वास्तविकतेपासून खूप दूर आहे,” असं म्हणत नायडूंनी रमेश यांच्या दाव्यावर टीका केली. कार्यक्रम सुरळीत पार पाडण्यासाठी काही काळ मंचावर हस्तक्षेप करावा लागला, असं त्यांनी सांगितलं. तसेच लोकांचा उत्साह आणि आनंद याकडे संताप म्हणून पाहणं