Nilesh Lanke | Gund Gajanan Marne : अहमदनगरचे नवनियुक्त खासदार नीलेश लंके सध्या पुण्याच्या दौऱ्यावर आहेत. खासदार झाल्याने ते अनेकांच्या भेटी घेत आहेत. दरम्यान, गुरुवारी लंके हे पुण्यातील अट्टल गुंड गजा मारणे याच्या घरी गेले. लंके यांनी मारणे यांची भेट घेतली. यावेळी गजा मारणे याने लंके यांचा शाल श्रीफळ देऊन सत्कार केला.

सध्या त्यांच्या या भेटीचा व्हिडिओ सोशल मिडियावर चांगलाच व्हायरल होतो आहे. निलेश लंके हे या व्हीडिओत गजा मारणे याच्या कडून सत्कार स्वीकारताना दिसत आहे. त्यामुळे आता यावरुन राजकीय वाद सुरु झाला आहे.

उपमुख्यमंत्री अजित पवार यांचे चिरंजीव पार्थ पवार यांनी गजा मारणे यांची निवडणुकीपूर्वी घरी जाऊन भेट भेटली होती. यावेळी गजा मारणे याने पार्थ यांचा सत्कार देखील केला होता. दरम्यान, पार्थ पवार यांच्या भेटीवरून शरद पवार गटाने अजित पवार यांना कोंडीत पकडले होते. त्यांच्यावर टीका देखील केली होती.

अजित पवार हे गुंडांना अभय देत असल्याची अनेकांनी टीका देखील केली होती. मात्र, आता शरद पवार राष्ट्रवादी पक्षाचे खासदार नीलेश लंके यांनी गजा मारणे यांची भेट घेऊन सत्कार स्वीकारल्याने त्यांच्यावर आता जोरदार टीका होताना दिसत आहे. त्यांचा व्हिडिओ सुद्धा सोशल मीडियावर चांगलाच व्हायरल होत आहे.

दरम्यान, आता या सगळ्या प्रकरणावर निलेश लंके यांनी उत्तर दिलं आहे. माध्यमांशी बोलताना निलेश लंके म्हणाले की, ‘मी दिल्लीवरुन आलो. माझे पवार नावाचे सहकारी होते. त्यांचे कर्करोगाच्या आजाराने निधन झाले. त्यांच्या नातेवाईकांची भेट झाल्यानंतर आम्ही परत निघालो. त्यावेळी त्या भागातील आमचा राष्ट्रवादी काँग्रेसचा पदाधिकारी प्रविण धनवे यांच्या घरी गेलो.

त्याच्या घरुन निघाल्यानंतर मारणे यांच्या घराजवळ आम्हाला चार सहा लोकांनी थांबवले. त्यांनी चहा पिण्यासाठी बोलवले. आम्हाला तोपर्यंत कोणाची काहीच पार्श्वभूमी माहीत नव्हती. त्यावेळी माझा सत्कार करण्यात आला. तोपर्यंत गजानन मारणे कोण हे मला माहीत नव्हते. नंतर दोन तासांनी संबंधित व्यक्ती माहिती कळाली. तो एक अपघात होतो. कळत न कळत चूक झाली. असं लंके यावेळी म्हणाले.

निलेश लंके पुढे म्हणाले, ‘टीका करणे हे त्यांचे कामच आहे. त्यांच्याकडे दुर्लक्ष केले गेले पाहिजे. गजा मारणे कोण होता, हे मला माहीत नव्हते. मला त्या व्यक्तीची ओळखच नाही. माझ्या मतदार संघात एक गुंड प्रवृत्तीचा व्यक्ती नाही, त्यामुळे निवडणुकीत गजा मारणेची मदत झाल्याचा प्रश्नच येत नाही’, असं देखील ते यावेळी म्हणाले.