Nikhil Gupta Extradition: भारतीय नागरिक निखिल गुप्ता याच्या अमेरिकेला प्रत्यार्पण करण्यास चेक प्रजासत्ताकच्या अपील न्यायालयाने मान्यता दिली आहे. खलिस्तानी दहशतवादी गुरपतवंत सिंग पन्नूची अमेरिकेच्या भूमीवर हत्या करण्याच्या कटात सामील असल्याचा आरोप अमेरिकेने केला होता. चेक प्रजासत्ताक न्याय मंत्रालयाच्या प्रवक्त्यानुसार, निखिल गुप्ताच्या प्रत्यार्पणाबाबतचा अंतिम निर्णय न्यायमंत्री पावेल ब्लाझेक यांच्याकडे आहे. 52 वर्षीय भारतीय नागरिक निखिल गुप्ताला अमेरिकेच्या विनंतीवरून 30 जून रोजी चेक रिपब्लिकमध्ये अटक करण्यात आली होती. यूएस फेडरल वकिलांनी निखिल गुप्तावर खून केल्याचा आरोप केला आहे. या अंतर्गत जास्तीत जास्त 10 वर्षांच्या तुरुंगवासाच्या शिक्षेची तरतूद आहे. काय आहेत निखिल गुप्ताच्या वकिलांचा युक्तिवाद? (Nikhil Gupta Extradition) स्थानिक वृत्तानुसार, निखिल गुप्ताच्या वकिलांनी न्यायालयात युक्तिवाद केला की निखिलची अटक चुकीच्या ओळखीमुळे झाली. वकिलाने सांगितले की, निखिल गुप्ताची अटक राजकीय हेतूने प्रेरित आहे. डिसेंबरमध्ये कनिष्ठ न्यायालयाच्या निर्णयाविरुद्ध भारतीय नागरिकाने अपील केल्यानंतरही प्राग उच्च न्यायालयाने हा निर्णय कायम ठेवला आहे. न्याय मंत्रालयाच्या प्रवक्त्याने सूचित केले आहे की अंतिम निर्णय आता न्याय मंत्री पावेल ब्लाझेक यांच्यावर अवलंबून आहे. मात्र, न्यायमंत्र्यांचा निर्णय कधी येणार याबाबत स्पष्ट माहिती नाही. अमेरिकेने कोणते पुरावे दिले? (Nikhil Gupta Extradition) यूएस कोर्टातील आरोपाशी संबंधित कागदपत्रांमध्ये, निखिल गुप्ताला कटाशी जोडण्यासाठी संवादाचे तपशील सामायिक केले गेले. यासोबतच पैशाची देवाण-घेवाण आणि ‘भाड्याच्या किलर’ला आगाऊ रक्कम दिल्याचे काही छायाचित्रेही सादर करण्यात आली होती. अमेरिकेने असा दावा केला आहे की निखिल गुप्ताने ज्याला आगाऊ रक्कम दिली होती तो ‘भाड्याने घेतलेला किलर’ हा गुप्त अमेरिकन एजंट होता. मात्र, निखिल गुप्ता यांच्या वकिलाने पैशांच्या व्यवहाराच्या छायाचित्रांबाबत सांगितले की, ती छायाचित्रे काहीही सांगत नाहीत. म्हणजेच तो पुरावा म्हणून सादर करू नये कारण हा फोटो कसाही क्लिक केला जाऊ शकतो.
