प्रभात वृत्तसेवा उरुळी कांचन – जेजुरी-उरुळी कांचन रस्त्यावरील शिंदवणे (ता. हवेली) येथील हद्दीत टेम्पोने समोरून येणाऱ्या दुचाकीला जोरदार दिलेल्या धडकेत दुचाकीवरील दोघेजण गंभीर जखमी झाल्याची घटना घडली. वाकवस्ती परिसरात गुरुवारी (दि.11) रात्री साडे दहा वाजण्याच्या सुमारास हा अपघात झाला. अपघातानंतर टेम्पोचालक वाहन सोडून फरार झाला आहे. त्याचे नाव अद्याप समजू शकले नाही. त्याच्यावर उरुळी कांचन पोलीस ठाण्यात गुन्हा दाखल करण्यात आला आहे.प्रणव संभाजी ढमढेरे (वय 21), व सार्थक विजय ढमढेरे (वय 20, दोघेही रा. तळेगाव ढमढेरे ता. शिरुर), असे अपघातात जखमी झालेल्या दोघांची नावे आहेत. याप्रकरणी दीपक दत्तात्रय ढमढेरे (वय 20, रा. तळेगाव ढमढेरे) यांनी फिर्याद दिली आहे. गुरुवारी फिर्यादी व त्यांचे चुलत भाऊ असे तिघेजण देवदर्शनासाठी दुचाकीवरून गेले होते. संध्याकाळी तळेगाव ढमढेरे येथे दुचाकीवरून माघारी घरी निघाले होते. शिंदवणे ग्रामपंचायत हद्दीतील वाकवस्ती परिसरात आले असता उरुळी कांचनवरून जेजुरी बाजूकडे भरधाव वेगाने एक टेम्पो निघाला होता. टेम्पो चालकाने भरधाव वेगात राँग साईडला येत दुचाकीवरील तिघांना जोरदार धडक दिली. यावेळी दुचाकी ही टेम्पोच्या समोर पडल्याने ट्रकचालक न थांबता चालकाने 100 मीटरपर्यंत दुचाकी फरफटत नेली. यावेळी दुचाकीवरील प्रणव ढमढेरे व सार्थक ढमढेरे हे गंभीर जखमी झाले. त्यांच्या पाठीमागे बसलेला आणखी एकजण किरकोळ जखमी झाला. दरम्यान, हवालदार उद्धव गायकवाड यांनी तात्काळ घटनास्थळी धाव घेतली. रुग्णवाहिकेचे वैभव कदम व कस्तुरी रुग्णवाहिकेचे संतोष झोंबाडे यांनी तात्काळ जखमी झालेल्या दोघांना दोन्ही रुग्णवाहिकेतून उरुळी कांचन येथील सिद्धिविनायक हॉस्पिटलमध्ये उपचारासाठी दाखल केले. सिद्धिविनायक रुग्णालयात प्राथमिक उपचार झाल्यानंतर पुढील उपचारासाठी पुण्यातील एका बड्या खाजगी रुग्णालयात दाखल करण्यात आल्याची माहिती मिळाली आहे. तपास पोलीस हवालदार उद्धव गायकवाड करीत आहेत.
