शिक्रापूर – शिरूर तालुक्यातील एका शाळकरी विद्यार्थ्याचा वाहनाला धडकून मृत्यू झाल्याची घटना ताजी असतानाच आज सकाळच्या सुमारास वढू बुद्रुक येथील शरदचंद्रजी पवार माध्यमिक विद्यालयाच्या शिक्षकाचा पुणे-नगर महामार्गावर कारेगावनजीक अपघाती मृत्यू झाला. संजय सीताराम कदम असे मृत्यू झालेल्या शिक्षकाचे नाव आहे. सत्तावीस वर्षे ज्ञानदानाचे काम करणाऱ्या शिक्षकाच्या मृत्यूने विद्यार्थ्यांसह गाव हळहळले आहे. वढू बुद्रुक (ता. शिरूर) येथील शरदचंद्रजी पवार माध्यमिक विद्यालयाचे शिक्षक संजय कदम आज सकाळच्या सुमारास (एमएच 12 एलजी 7851) या दुचाकीवरून वाडेगव्हाण येथे जाताना कारेगावनजीक त्यांना फोन आल्याने ते दुचाकी रस्त्याच्या कडेला घेऊन फोनवर बोलताना पाठीमागून दोन ट्रॉली घेऊन भरधाव वेगाने आलेल्या ट्रॅक्टरची कदम यांना धडक बसल्याने ते रस्त्याच्या कडेला पडले व पाठीमागून आलेल्या ट्रॅक्टरचे चाक त्यांच्या अंगावरून गेल्याने संजय कदम जखमी झाले. उपचारासाठी शिरूर येथील रुग्णालयात नेले असता, डॉक्टरांनी त्यांना मृत घोषित केले. या अपघातात संजय सीताराम कदम (वय 45, रा. पाबळ चौक, शिक्रापूर, ता. शिरूर, जि. पुणे. मूळ रा. वाडेगव्हाण, ता. पारनेर, जि. अहमदनगर) यांचा मृत्यू झाला. याबाबत राजेंद्र बाळासाहेब धुमाळ (वय 43, रा. पिंपळे खालसा, ता. शिरूर, जि. पुणे) यांनी रांजणगाव एमआयडीसी पोलीस स्टेशन येथे फिर्याद दिली असल्याने रांजणगाव पोलिसांनी ट्रॅक्टर चालक महेश किसन चव्हाण (रा. उंबरखेडा, ता. कन्नड, जि. अहमदनगर) याच्या विरुद्ध गुन्हा दाखल केला असून, पुढील तपास पोलीस निरीक्षक बलवंत मांडगे यांच्या मार्गदर्शनाखाली पोलीस हवालदार संतोष पवार हे करत आहेत. शिस्तबद्ध शिक्षकाचा शिस्तीतून मृत्यू – संजय कदम हे अतिशय शिस्तबद्ध तसेच मनमिळावू होते, ते पुणे-नगर जात असताना मोबाइलवर फोन आल्याने ते वाहतुकीचे नियम पाळून शिस्तीने रस्त्याच्या कडेला हेल्मेट काढून उभे राहून शिस्तीने मोबाइलवर बोलताना त्यांचा अपघात होऊन मृत्यू झाला. त्यामुळे शिस्तबद्ध शिक्षकाचा शिस्तीतून मृत्यू झाला असल्याची भावना अनेक ग्रामस्थांनी व्यक्त केली.
