Electric Shock Death – किकवी (ता. भोर) येथे शेळीच्या चाऱ्यासाठी झाडावर चढलेल्या एका २३ वर्षीय तरुणाचा विजेचा तीव्र धक्का लागून मृत्यू झाल्याची हृदयद्रावक घटना शुक्रवारी (दि. १०) दुपारी घडली. गणेश रामय्या भंडारी (वय २३) असे मृत तरुणाचे नाव आहे. गणेश भंडारी हे शेळीपालन करून आपला उदरनिर्वाह करत होते. शुक्रवारी दुपारी शेळ्यांच्या चार्यासाठी ते झाडावर पाला तोडण्यासाठी चढले होते. यावेळी झाडाची एक फांदी जवळूनच गेलेल्या महावितरणच्या उच्च दाबाच्या वीज वाहिनीला स्पर्श झाली. झाडातून विजेचा प्रवाह उतरल्याने गणेश यांना जोरदार धक्का लागला आणि त्यांचा जागीच मृत्यू झाला. या घटनेची माहिती मिळताच ग्रामस्थांनी घटनास्थळी धाव घेत महावितरणच्या अधिकाऱ्यांना कळविले. स्थानिक पोलिसांनी घटनेचा पंचनामा करून मृतदेह शवविच्छेदनासाठी भोर येथील उपजिल्हा रुग्णालयात पाठवला आहे.
